ප්‍රංශය සහ ඇමෙරිකා එක්සත් ජනපදය ඩිජිටල් බදු ගිවිසුමකට එළැඹුණේ යැයි ප්‍රංශ ජනාධිපති එමානුවෙල් මැක්රෝන් මහතා සඳුදා පැවැසීය.

ප්‍රංශය තුළ කරන ඩිජිටල් සේවාවලින් ලබන ආදායම මත 3%ක බද්දක් පැනවීමට අනුමැතිය දෙමින් ප්‍රංශය මේ වසර මුලදී නීතියක් සම්මත කරගත්තේය.

මේ නිසා අන්තර්ජාල සේවා සපයන මහ පරිමාණ සමාගම්වලට ප්‍රංශ රජයට බද්දක් ගෙවීමට සිදු වූ අතර එම නිසා ඇමෙරිකාව සහ ප්‍රංශය අතර අර්බුදකාරී තත්ත්වයක් නිර්මාණය විය.

ප්‍රංශය ඉහත කී නව නීතිය සම්මත කරගැනීමෙන් පසුව ඊට ප්‍රතිචාර දැක්වීමක් ලෙස ප්‍රංශයට තීරුබදු පනවන බවට ඇමෙරිකානු ජනාධිපති ඩොනල්ඩ් ට්‍රම්ප් මහතා අනතුරු ඇඟවීමක් ද කළේය.

අන්තර්ජාල සමාගම් බදු ගෙවිය යුත්තේ කෙසේදැයි සම්බන්ධයෙන් ලබන වසරේදී නව ගිවිසුමක් ඇති කරගන්නා බවත් ඒ අනුව දැනට බදු ගෙවන සමාගම්වලින් ඔවුන් ගෙවූ බදු අඩු කෙරෙන බවත් ප්‍රංශ ජනාධිපතිවරයා මාධ්‍යවේදීන් හමුවේ පැවැසීය.

"ද්වීපාර්ශවීය වශයෙන් අපි බොහෝ වැඩ කොටසක් කරලා අවසන්. අපි අතරේ තිබෙන දුෂ්කරතා සහ අභියෝගවලට මුහුණ දෙන්න පුළුවන් ගිවිසුමක් තියෙනවා" යැයි ද හෙතෙම කීය. ඇමෙරිකානු ජනාධිපති ඩොනල්ඩ් ට්‍රම්ප් පසෙකින් සිටියදී ප්‍රංශ ජනාධිපතිවරයා එම කරුණු සඳහන් කළේය.

ජී7 ලෝක නායක සමුළුව අවසානයේ දී මෙම මාධ්‍ය හමුව පැවැත්විණි.

(රොයිටර් ඇසුරිනි)

055