රුසියානු ජනාධිපති ව්ලැදිමීර් පුටින් හමුවී යුක්රේන අර්බුදය ගැන සාකච්ඡා කිරීමෙන් පසු, ප්‍රංශ ජනාධිපති ඉමැනුවෙල් මැක්රොන් යුක්රේනයේ කීව් අගනුවරට ගොස්, යුක්රේන ජනාධිපති ව්ලොදිමීර් සෙලෙස්නිකී හමුවී සාකච්ඡා පැවැත්වීය.

රුසියාවත් යුක්රේනයත් අතරේ අර්බුදයක් පවතින්නේත්, රුසියාව යුක්රේනය ආක්‍රමණය කිරීමට සූදානම් වෙනවා යැයි ඇමෙරිකාව චෝදනා නගන්නේත්, යුක්රේනය නේටෝ සංවිධානය සමඟ සමීපව කටයුතු කරන බැවිනි. රුසියාව පවසන්නේ, යුක්රේනය නේටෝවට සමීපවීම රුසියාවේ ජාතික ආරක්ෂාවට තර්ජනයක් බවය.

‘නේටෝ’ හෙවත් උතුරු අත්ලාන්තික් ගිවිසුම් සංවිධානය යනු ඇමෙරිකාව, කැනඩාව, ජර්මනිය, ප්‍රංශය ආදී බටහිර යුරෝපා රටවල් එක් වී, රුසියාවෙන් එල්ල වන තර්ජන පිටුදැකීමේ අරමුණින් පිහිටුවාගත් සන්ධානයයි.
ප්‍රංශ ජනාධිපති පළමුවෙන් රුසියන් ජනාධිපති ව්ලැදිමීර් පුටින් හමුවී, පසුව යුක්රේනයට ගොස් යුක්රේන ජනාධිපති සෙලන්සිකී හමුවූයේ අර්බුදය යුද්ධයකට යෑමට ඉඩ නොතබා සාමකාමීව විසඳා ගැනීමට මැදිහත් වෙමිනි.

රුසියන් ජනාධිපති ව්ලැදිමීර් පුටින් හමුවී සාකච්ඡා කිරීමේදී, ජනාධිපති පුටින් ඉදිරිපත් කළ ඇතැම් ඉල්ලීම් සාධාරණ බව තමන්ට පෙනී ගියේ යැයි ප්‍රංශ ජනාධිපතිවරයා මාධ්‍ය හමුවේ පවසා ඇත. යුක්රේනයට එරෙහිව තමන් යුදමය ක්‍රියාමාර්ගයකට නොයන බවට පුටින් තමන්ට සහතික වූ බව ද ප්‍රංශ ජනපති මැක්රොන් මාධ්‍ය හමුවේ වැඩි දුරටත් කියා සිටියේය.

(රොයිටර්)