පෝර විස නසන්න දුම්වැටි අළු

රසායන පොහොර භාවිතය අධික පෙදෙස් වල ජලයේ මිශ්‍රවී තිබිය හැකි උග්‍ර විෂකාරකයක් වන ආසනික් ඉවත් කිරීමට දුම්වැටි අළු යොදාගත හැකියැයි චීන විද්‍යාඥයෝ පිරිසක් කියති.

කෘෂිකර්මාන්තය මහා පරිමානයෙන් සිදුවන හා කර්මාන්ත විශාල වශයෙන් පිහිටා ඇති පෙදෙස් වල ජලයට ආසනික් මිශ්‍ර වීමට ඉහළ සම්භාවිතාවක් ඇත.

ආසනික් මිශ්‍ර ජලය භාවිතයට ගැනීම යනු රෝග ගණනාවකට අත වනන්නක් වන අතර වැඩිපුරම හානි සිදුවන්නේ වකුගඩු වලටය.

තමන් සිදුකළ පර්යේෂණයට අනුව ඇළුමිනියම් ඔක්සයිඩ් මිශ්‍ර කළ දුම්වැටි අළු වලින් ආසනික් මිශ්‍රිත ජලයෙන් සියයට 96 ක ප්‍රමාණයකින් ආසනික් ඉවත් කළ හැකි යැයි සොයාගත් බව විද්‍යාඥ පිරිස පවසති.

මින් පෙර අවස්ථාවක කෙසෙල් ලෙලි යොදාගනිමින්ද ඔවුන් ජලයෙන් ආසනික් ඉවත් කිරීමට උත්සාහ කර තිබෙන අතර එයට වඩා මෙම ක්‍රමය සාර්ථක ප්‍රතිඵල ලබාදී තිබේ.

චීනයේ ආසනික් මිශ්‍ර ජලයෙන් රෝගී වන්නන් දිනෙන් දින ඉහළ යන ප්‍රවණතාවක් පවතින හෙයින් විද්‍යාඥ පිරිස උත්සාහ කරමින් සිටින්නේ ආසනික් ඉවත් කිරීමට ප්‍රායෝගික හා ලාභදායී ක්‍රමයක් සොයාගැනීමටය.