චීනයේ ගුවැංසු චිමලොං සගාරි උද්‍යාන ප්‍රදේශයේ දී පැන්ඩා මවක් තුන් නිවුන් දරුවන් බිහිකැර ඇතැයි විදෙස් මාධ්‍ය වාර්තාකරයි. වඳවීයාමේ තර්ජනයට මුහුණ දී ඇති පැන්ඩා පැටවුන් බිහිවන්නේ ඉතා සුළු වශයෙනි. පැන්ඩා මවක් එක් වරකට සාමාන්‍යෙයන් බිහිකරන්නේ එක් පැටවකු පමණි. උපත ලබන පැටවුන් ද ජීවත්වන්නේ ඉතා සුළු පිරිසකි.

පැන්ඩා අභිජනනය සම්බන්ධ චෙන්ජු පර්යේෂණ මධ්‍යස්ථානය පවසන්නේ චීනයේ බිහිවන පැන්ඩා පැටවුන්ගෙන් ළදරුවිය ඉක්මවා ජීවත්වන්නේ සියයට 30ක පමණ ප්‍රමාණයක් බවයි. 1999 දී චීනයේ පැන්ඩා මවක් පැටවුන් දෙදෙනකු බිහි කළ ද ඉන් එක් පැටවකු දින තුනකට පසු මියගියේය.

දැනට නිරෝගී තත්ත්වයේ පසුවන මේ පැටවුන් ග්‍රෑම් 83, 90 හා 122 වශයෙන් බරින් යුක්ත බව උද්‍යාන භාරකරු කියයි. පරිසරවේදීන් පවසන්නේ තුන් නිවුන් පැන්ඩා පැටවුන් මින් පෙර වාර්තා නොවූ බවයි.

පැටවුන් බිහි කළ පැන්ඩා මව 12 වියැතිය. ‘ක්‍රිසාන්තිනම් සිනහව‘ යන අර්ථය එන අයුරින් ‘ජුක්සියෝ‘ යනුවෙන් මේ මවට නම් තබා ඇත. ක්‍රිසාන්තිනම් යන අලංකාර මලකි.