නයිට්රිජන් ඔක්සයිඩ් වායු විමෝචනය සීමා කිරීමේ ආණ්ඩුවේ සැලැසුම්වලට විරෝධතා දක්වමින් නෙදර්ලන්ත ගොවියෝ එරට අගනුවරට එක්රැස්ව විරෝධතාවල නිරතවෙති.

නෙදර්ලන්ත ගොවියෝ පසුගිය වසරේ සිට අවස්ථා කිහිපයකදී ආණ්ඩුවේ ක්‍රියාමාර්ගවලට එරෙහිව විරෝධතාවල නිරත වූහ.

මෙම නව විරෝධතා ආරම්භ වූයේ පෙරේදාය. නෙදර්ලන්ත ගොවියෝ දහස් ගණනක් මේ හේග් නුවරට රැස්ව විරෝධතාවයේ නියැළෙති.

විරෝධතාකරුවන් ට්‍රැක්ටර් රථ රැගෙන නගරයට පැමිණි අතර හමුදාව විශාල  රථ හරස් කරමින් ඔවුන් නගරයේ කාර්යබහුල ස්ථානවලට යෑම වැළැක්වූහ. හේග් අගනුවර ව්‍යාපාරික ස්ථාන සහ සාප්පු සංකීර්ණ රැසක් පිහිටා තිබෙන අතර එරටට උපායමාර්ගික වශයෙන් වැදගත් මාර්ග ද අගනුවර හරහා දිවෙයි.

නයිට්‍රජන් ඔක්සයිඩ් පරිසරය දූෂණය කරන වායුවක් වන අතර එම වායුව පිටවීම අඩු කිරීමේ අරමුණින් පාර්ලිමේන්තුවේදී ඉකුත් දා විවාදයක් ද පැවැත්විණි. මෙම විරෝධතා ආරම්භ වූයේ එම විවාදයෙන් දිනකට පසුවය.

රජයේ අරමුදලින් ක්‍රියාත්මක නෙදර්ලන්තයේ මහජන සෞඛ්‍ය සහ පරිසරය පිළිබඳ ජාතික ආයතනයේ වාර්තා මත පදනම් වී නයිට්‍රජන් වායු විමෝචනය සීමා කිරීමට නෙදර්ලන්ත ආණ්ඩුව එලෙස තීරණය කර ඇත. ඒ සම්බන්ධයෙන් ගැනීමට නියමිත නව ක්‍රියාමාර්ග හා පියවර අද (20) නිවේදනය කිරීමට නියමිතව තිබිණි.

වේගයෙන් වගා කටයුතුවල නිරත වීමත් විශේෂයෙන්ම සත්ව ගොවිපොළ කටයුතු නිසාත් වැඩි වශයෙන් නයිට්‍රජන් වායුව පිටවන බවත් එම නිසා පරිසර දූෂණය වැඩි බවත් එම ආයතනය සඳහන් කර තිබිණි.

කෙසේ නමුත් පාර්ලිමේන්තු මන්ත්‍රීවරුන් වුවමනාවෙන්ම සහ අසාධාරණ ලෙස තමන් ඉලක්ක කරගෙන ඇතැයි ගොවීහු චෝදනා කළහ. ගුවන් සේවා, ඉදි කිරීම් සහ අනෙකුත් ප්‍රධාන කර්මාන්ත ද නයිට්‍රජන් වායුව පිට කරන බවත් ඔවුන් පරිසර දූෂණයට තමන්ට වඩා වැඩි දායකත්වයක් දක්වන බවත් ගොවීහු චෝදනා කළහ.

දේශපාලනඥයන් ගොවීන්ට කන් දිය යුතු බව ද ගොවීහු සඳහන් කළහ. නෙදර්ලන්තයේ කෘෂිකාර්මික අංශය ලාභ උපදවන අංශයක් වන අතර වායු විමෝචනය අඩු කිරීමට සැලැසුම් කරන දේශපාලනඥයන් කෘෂිකාර්මික අංශයේ රැකියා ආරක්ෂා කිරීම සම්බන්ධයෙන් අවධානය යොමු කළ යුතු යැයි ද ගොවීහු කීහ.

‘‘අපේ ආණ්ඩුව ගම්බද පිටිසර තැන්වලින් ගොවීන් අතුගා දමනවා. ඔවුන්ගේ ගෙවල්වල පැළ වවනවා. ඒ අතරේ ධාන්‍ය ගබඩා විනාශ කරමින් කෘෂිකර්මයේ මතක සටහන් මකා දමනවා’’ යැයි මෙම විරෝධතා සංවිධානය කළ ගොවීන්ගේ ආරක්ෂක බලකයේ සියෙටා වැන් කයිම්පෙමා පැවැසුවාය.

‘‘අපි වසර ගණනක ඉඳන් ගොවිතැන් කරන්නේ. ආණ්ඩුවට නයිට්රවජන් වායුව පිටවීම සීමා කරන්න ඕනෑ නම් වෙනත් පලදායී ක්‍රම යොදාගන්න අපට අවස්ථාවක් දෙන්න ඕනෑ’’ යැයි විරෝධතාවලට සහභාගී වීම සඳහා උතුරු නෙදර්ලන්තයේ ෆ්රීයස්ලන්ඩ් හි සිට පැමිණි ගොවියකු වන වයිපි රෙයින්ස්මා පැවැසීය.

‘‘ඇයි මේ හැමදේම ගොවීන් ඉලක්ක කරගෙන කරන්නේ’’ යැයි ඔහු විමසීය.

නෙදර්ලන්ත පොලිසිය එරට ප්‍රධාන මාර්ගවල ට්‍රැක්ටර් රථ පැදවීම සඳහා ගොවීන් කිහිපදෙනකුට අවසර ලබා දී ඇත. එය නොසලකා හරිමින් හේග් නුවර ට්‍රැක්ටර් රථයක් පැදවූ 33 හැවිරිදි ගොවියකු අත්අඩංගුවට ගැනීමට පොලිසිය කටයුතු කර තිබිණි. හෙතෙම විරෝධතාවට සහභාගී වූ අයකු යැයි වාර්තා විය. හෙතෙම මහා මාර්ගයේ අනතුරුදායක තත්ත්වයක් නිර්මාණය කළේ යැයි පොලිසිය සඳහන් කර තිබිණි.

ගොවීන් සිය ගණනක් නෙදර්ලන්ත කෘෂිකර්ම අමාත්‍යාංශයට ඇතුළුවීමට උත්සාහ කළ අතර එහිදි තවත් අයකු අත්අඩංගුවට ගත් බව පොලිසිය සඳහන් කළේය.

පසුගිය වසරේ ඔක්තෝබර් මාසයේදීද මේ ආකාරයේ දැවැන්ත විරෝධතාවක් පැවැත්විණි. ගොවීහු ඊට ද ට්‍රැක්ටර් රථවලින් හේග් අගනුවරට පැමිණියහ. ඒ නිසා හේග් නුවර මෙන්ම රටේ බොහෝ තැන්වල මාර්ග තදබද ඇතිවිය.

කෙසේ නමුත් මෙවර විරෝධතාවයට ඔක්තෝබර් මාසයේදී මෙන් ට්‍රැක්ටර් රථ පැමිණ නැති බවත් මාර්ගවල එතරම් අර්බුදයක් හටනොගත් නෙදර්ලන්ත බලධාරීහු කීහ.

නෙදර්ලන්ත ආණ්ඩුව එරට ගොවිපොළ නවීකරණයට කිරීමට ද සූදානම් වේ. ඒ සඳහා යූරෝ මිලියන ගණනක අරමුදලක් ද පිහිටුවා ඇති අතර තම සාම්ප්‍රදායික ගොවිපොළ වසා දමා නවීකරණය කරන ලද ගොවිපොළවලට යොමු වන්නැයිද ගොවීන්ගෙන් ඉල්ලීමක් කර ඇත. ආණ්ඩුව එහිදි ස්වේඡාවෙන් සිය සාම්ප්‍රදායික ගොවිපොළ වසා දමන ගොවීන්ගෙන් එම ගොවිපොළ මිලදී ගනී.

ආණ්ඩුව තීන්දු තීරණ ගන්නේ සහ සැලැසුම් සකස් කරන්නේ වැරැදි ගණනය කිරීම් සහ වැරැදි කියවීම් මත යැයි කෘෂිකර්මාන්තය සම්බන්ධයෙන් ආණ්ඩුවේ ක්රිනයාමාර්ග විවේචනය කරමින් ගොවීහු චෝදනා කළහ.

ඒ.එෆ්.පී/රොයිටර්

055