රුසියන් යුක්රේන යුද්ධය හමුවේ, ඇමෙරිකාව ඇතුළු බටහිර ප්‍රබල රටවල් රුසියාවට දිගට හරහට සම්බාධක පනවා තිබියදී, බ්‍රසිලය, ඉන්දියාව සහ චීනය රුසියාව සමඟ ගනුදෙනු කිරීම කිසිසේත් අනුමත කළ නොහැකි බව නේටෝ සංවිධානයේ මහ ලේකම් මාර්ක් රූට් පවසයි.

ඇමෙරිකාවේ වොෂින්ටන් අගනුවරට ගොස් සිටින රූට්, බ්‍රසිලයට, ඉන්දියාවට සහ චීනයට අනතුරු ඇඟවීමක් ද කළේය. ඒ, රුසියාව සමඟ දිගින් දිගටම ගනුදෙනු කරන්නේ නම්, එහි ඵලවිපාකවලට මුහුණ දීමට සිදුවනු ඇතැයි පෙන්වා දෙමිනි.

උතුරු අත්ලාන්තික් ගිවිසුම් සංවිධානය හෙවත් නේටෝ සංවිධානයේ මහ ලේකම්වරයා මෙසේ පැවැසුවේ, ඇමෙරිකන් ජනාධිපති ඩොනල්ඩ් ට්‍රම්ප් හමුවී රුසියන් යුක්රේන යුද්ධය ගැන සාකච්ඡා පැවැත්වීමෙන් පසු, ඇමෙරිකන් කොංග්‍රස් මණ්ඩල සෙනෙට් මන්ත්‍රීවරුන් හමුවුණු අවස්ථාවේදීය.

රුසියන් යුක්රේන යුද්ධය නැවැත්වීමටත් සාම වැඩපිළිවෙළකට යෑමටත් රුසියන් ජනාධිපති ව්ලැදිමීර් පුටින් කැමැති කරවා ගන්නැයි ද නේටෝ මහ ලේකම්වරයා බ්‍රසීලයෙන්, ඉන්දියාවෙන් සහ චීනයෙන් ඉල්ලීමක් ද කර ඇත.