ඇපලෝ 8 සහ ඇපලෝ 13 යන ගගන මෙහෙයුම්වලින් දෙවරක් සඳට ගිය සහ එක් වරක්වත් සඳට පය තැබීමට නොහැකි වූ පළමු මිනිසා ලෙස සැලකෙන නාසා ගගනගාමී ජිම් ලොවෙල් අභාවප්‍රාප්ත විය. මියයනවිට ඔහුගේ වයස අවුරුදු 97 කි.

 සිය නිවසේ දී, පවුලේ ආදරණීයයන් අසල සිටිද්දී, ලොවෙල් අවසන් සුසුම් හෙළූ බව ඇමෙරිකාවේ නාසා ආයතනය නිකුත් කළ නිවේදනයක දැක්වෙයි. ලොවෙල් උපන්නේ, 1928 වසරේදීය. 

1968 දී සිදු කළ ඇපලෝ 8 මෙහෙයුම යටතේ සඳට ගිය ඇපලෝ යානයේ සිටි ගගනගාමීන් තිදෙනාගෙන් කෙනකු වූයේ ලොවෙල් ය. ඇපලෝ 8 මෙහෙයුම සඳ බලා ගියත්, සඳ මතට ගගනගාමීන් රැගෙන ගිය මෙහෙයුමක් නොවීය. ලොවෙල් 1970 දී ඇපලෝ 13 මෙහෙයුමේ, ප්‍රධානියා ලෙස කටයුතු කළේය. ඇපලෝ 13 මෙහෙයුමට අයත් යානය, සඳ බලා යද්දී අතරමඟදී අකරතැබ්බකට මුහුණ දුන්නේය. ආපසු ආරක්ෂිතව පෘථිවය බලා පැමිණියේ ලොවෙල්ගේ නායකත්වයෙනි.