දකුණු අප්‍රිකාවේ පාසල් දරුවන් රැගත් බස් රියක් හදිසි සැඬ පහරට හසුවිය. විදෙස් මාධ්‍ය වාර්තා කළේ, සැඬ පහරට හසුවී ගසාගෙන ගිය බස් රියේ දරුවන් 30 දෙනකු පමණ සිටි බවය. බේරා ගැනීමට හැකිවූයේ දරුවන් තිදෙනකු බව ද පැවැසෙයි.

දකුණු අප්‍රිකාව අප්‍රිකා මහද්වීපයේ පහළින් පිහිටි රාජ්‍යයයි. මේ වනවිට දකුණු අප්‍රිකාවේ නැගෙනහිර කේප් ප්‍රාන්තයේ, ක්වාසුල් නටාල් පළාත දැඩි අයහපත් කාලගුණයෙන් බැටකයි. මහ වැසි පමණක් නොව, හිම පතනයක් සිදුවෙයි. දහස් ගණනකට විදුලිය ද අහිමි වී ඇත.

මහ වැසි හේතුවෙන් ගංගා පිටාර ගලා, පාසල් බස් රිය ගමන් කළ මාර්ගය හදිසියේ ජලයෙන් යටවුණු බවත්, බස් රිය මාර්ගයේ ඉදිරියට යෑමට උත්සාහ ගනිද්දී එය ගසාගෙන ගිය බවත් දකුණු අප්‍රිකා රජයේ ප්‍රකාශකයකු වන කුසෙල්වා රන්ජි මාධ්‍ය හමුවේ පැහැදිලි කර ඇත.

අයහපත් කාලගුණය හේතුවෙන්, මාර්ග සහ ගම්මාන රැසක් මුළුමනින්ම ජලයෙන් යටවී ඇති බවත් වාර්තා වේ. මේ අතර, සැඬ ජල පහරට හසුවීමෙන් තවත් පුද්ගලයන් හය දෙනකු ද ජීවිතක්ෂයට පත්ව ඇතැයි ද වාර්තා වේ.

(ඒ.එෆ්.පී.)