තෙල් අපනයන ඉක්මනින් ආරම්භ කරන්නැයි ඇමෙරිකා එක්සත් ජනපදය අද (21) ලිබියාවට දැනුම් දුන්නේය.

ලිබියාවේ හමුදා පාලක කලීෆා හෆ්තාර්ට සහාය දක්වන කණ්ඩායම් පසුගිය සතියේදී තෙල් සැපයුම් මාර්ග අවහිර කළේය.

තෙල් අපනයන ලිබියාවේ ජීවනාලිය ලෙස සැලකේ.
ජාතික තෙල් සංස්ථාවේ මෙහෙයුම් අත්හිටුවීම ලිබියාවේ ඇති වී තිබෙන හදිසි මානුෂීය අර්බුදය තවදුරටත් උග්‍ර කරන බව ට්‍රිපෝලි නුවර ඇමෙරිකානු තානාපති කාර්යාලය ට්විටර් පණිවුඩයක් නිකුත් කරමින් සඳහන් කළේය.

තෙල් සංස්ථාවේ මෙහෙයුම් අත්හිටුවීමෙන් දැනටත් පීඩා විඳින ලිබියානු ජනතාව මත තවත් බරක් පටවන බව ද එම ට්විටර් පණිවුඩයේ දැක්විණි.

“ජාතික තෙල් සංස්ථාවේ කටයුතු කඩිනමින් නැවත ආරම්භ කළ යුතු” යැයි ලිබියාවේ ඇමෙරිකානු තානාපති කාර්යාලය නිකුත් කළ ට්විටර් පණිවුඩයේ දැක්විණි.

හමුදා පාලක හෆ්තාර්ගේ බළඇණි එක්සත් ජාතීන්ගේ සංවිධානය පිළිගත් ආණ්ඩුවේ පාර්ශව සහ හමුදා සමඟ සටන් වදී. ඔවුහු පසුගිය සෙනසුරාදා තෙල් අපනයනය කරන ලිබියාවේ ප්‍රධාන පෙළේ වරාය කිහිපයක් අවහිර කළහ.

ලිබියාව සම්බන්ධයෙන් පැවැත්වුණු ජාත්‍යන්තර සාම සමුළුව ආරම්භ වීමට දිනකට පෙර ඔවුහු එසේ වරාය අවහිර කළහ.
තෙල් අපනයන ලිබියාවේ ප්‍රධාන ආදායම් මාර්ගය වන අතර වරාය අවහිර කිරීමෙන් ආදායම් මාර්ගවලට ද ප්‍රබල පහරක් එල්ල විය.

ආණ්ඩුවේ සහාය ලිබියාවට හමුදා යැවීමට තුර්කිය ගත් තීරණයට විරෝධය පළ කිරීමක් ලෙස හෆ්තාර්ගේ හමුදා බළඇණි එලෙස වරාය අවහිර කළේය.  

එම බාධා කිරීමේ හේතුවෙන් දෛනික තෙල් බැරැල් නිමැවුම මිලියන 1.3 සිට 500,000ක් අඩුවනු ඇති බවටත් ඇමෙරිකානු ඩොලර් මිලියන 55ක පමණ පාඩුවක් සිදුවනු ඇති බවටත් ලිබියාවේ ජාතික තෙල් සංස්ථාව අනතුරු ඇඟවීය.

උතුරු අප්‍රිකාවේ පිහිටි රටක් වන ලිබියාව තෙල් සම්පතින් පොහොසත්ය. නෙටෝ හමුදාවල සහාය ඇතිව 2011 වසරේදී ඇති වූ කැරැල්ලෙන් මුවම්මර් ගඩාෆි ඝාතනයට ලක්වූ අතර එතැන් පටන් ප්‍රතිවිරුද්ධ කල්ලි කණ්ඩායම් හා පාර්ශව අතරේ ගැටුම් පවතී.

ඒ.එෆ්.පී. 

055