ඇමෙරිකන් ජනාධිපති ඩොනල්ඩ් ට්‍රම්ප්ගේ රුව සහිත කාසියක් නිකුත් කිරීමට ඇමෙරිකානු භාණ්ඩාගාර දෙපාර්තමේන්තුව තීරණය කර ඇත. මෙම සමහරු කාසිය නිකුත් කෙරෙනු ඇත්තේ ඇමෙරිකාවේ  250 වැනි නිදහස් සැමරුම වෙනුවෙනිි.

ඩොලරයක වටිනාකමකින් යුත් මෙම සමරු කාසියේ එක් පැත්තකට ට්‍රම්ප්ගේ මුහුණේ පැතිකඩක් ද අනෙක් පැත්තට ට්‍රම්ප් ඇමෙරිකානුවන් වෙනුවෙන් ‘සටන් කරමු’ යැයි හඬ නගන රූපයක් ද ඇතුළත් වෙයි. ඇමෙරිකාවේ 250 වැනි නිදහස දින සැමරුම යෙදෙනු ඇත්තේ ලබන 2026 වසරටය.

ඇමෙරිකන් මුදල්වල (මුදල් නෝට්ටු සහ කාසි) ජීවතුන් අතර සිටින පුද්ගලයන්ගේ රූප යෙදීම සිදුවන්නේ කලාතුරකිනි. ජීවත්වන පුද්ගලයන්ගේ සහ ජනාධිපතිවරුන්ගේ රූප මුදල්වල යෙදීම වැළැක්වීම සඳහා කොංග්‍රසය (ඇමෙරිකන් පාර්ලිමේන්තුව) නීති පනවා ඇත. එසේ වුවත්, භාණ්ඩාගාර දෙපාර්තමේන්තුව යෝජනා කර ඇති මෙම නවතම ‘ට්‍රම්ප් කාසිය’ එම නීතිවලට පටහැනි ද නැද්ද යන්න සම්බන්ධයෙන් මේ වනවිට වාද විවාද හටගෙන ඇත.
භාණ්ඩාගාර දෙපාර්තමේන්තුව මෙම සමරු කාසිය පිළිබඳ මාධ්‍ය දැනුවත් කළේ, ඇමෙරිකාව රජය අඩපණ වී ඇති අවස්ථාවකය. ඇමෙරිකාව පසුගිය පළමු වැනිදා සිට දින 5 ක් තිස්සේ අඩපණ වී ඇත. ක්‍රියාත්මක වන්නේ අත්‍යාවශ්‍ය රාජ්‍ය සේවා පමණි.

සෑම වසරකම ඔක්තෝබර් 1 වන දින ඇමෙරිකාවේ නව මූල්‍ය වර්ෂය ආරම්භ වන අතර, ඊට පෙර රජයට මුදල් වියදම් කිරීමට අවසර දෙන නීති සම්මත නොකළහොත්, බොහෝ ෆෙඩරල් ආයතනවලට මුදල් වියදම් කිරීම නැවතී යයි. මේ වනවිට සිදුවී ඇත්තේ එයයි.

ඇමෙරිකාව අඩපණ වී ඇත්තේ පාලක රිපබ්ලිකන් පක්ෂය සහ ප්‍රතිවාදී ඩිමොක්‍රටික් පක්ෂය අතරේ, සෞඛ්‍ය සේවා සම්බන්ධයෙන් හටගත් මත ගැටුම නිසාය. ජාතික ආරක්ෂාව, දේශසීමා ආරක්ෂාව, ගුවන් ගමනාගමන පාලනය, තැපැල් සේවය, සහ ෆෙඩරල් නීති බලාත්මක කිරීම වැනි අත්‍යාවශ්‍ය සේවා ක්‍රියාත්මක වන අතර, අනෙකුත් සේවා සියල්ල මේ වනවිට අඩපණ වී ඇත.