ඇමෙරිකා එක්සත් ජනපද ජනාධිපති ඩොනල්ඞ් ට්‍රම්ප්ගේ නමින් උභයජීවියකු නම් කිරීමට විද්‍යාඥයන් තීරණය කර ඇත. 

ඇමෙරිකා ජනාධිපතිවරයා දේශගුණික විපර්යාස සම්බන්ධයෙන් කරන ලද ප්‍රකාශවලට ප්‍රතිචාරයක් ලෙස වැලි අස්සේ හිස සඟවා ගන්නා මෙම උභයජීවියා ඩොනල්ඞ් ට්‍රම්ප් යනුවෙන් නම් කිරීමට පියවර ගෙන ඇත. 

මෙම උභයජීවියා සොයාගෙන ඇත්තේ පැනමාවේදී වන අතර ‘ඩර්මෝෆිස් ඩොනල්ඞ්ට්‍රම්ප්’ එම සත්වයාට ලබා දී තිබෙන විද්‍යාත්මක නාමයයි. 

‘එන්විරෝබිල්ඞ්’ සමාගම එලෙස එම සත්වයා නම් කර තිබෙන අතර තම සමාගමට දේශගුණික විපර්යාස පිළිබඳව දැනුවත් කිරීමට අවශ්‍ය යැයි ද සඳහන් කරයි. 

මෙම සත්වයා දේශගුණික විපර්යාසවලට ප්‍රතිචාර දක්වන සත්වයකු බවත් එම නිසාම වඳවී යෑමේ තර්ජනයට ලක්ව ඇති බවත් ‘එන්විරෝබිල්ඞ්’ සමාගමේ සම නිර්මාතෘ එයිඩන් බෙල් නිවේදනයක් නිකුත් කරමින් සඳහන් කළේය. 

මෙම සත්වයා අන්ධ උභයජීවියකු යැයි ද පැවසේ. මෙම සත්වයාගේ  සහ  ජනාධිපති ඩොනල්ඞ් ට්‍රම්ප්ගේ හැසිරීම අතර සමානතාවක් තිබෙන බව ද බෙල් පෙන්වා දී ඇත. 

මනුෂ්‍ය ක්‍රියාකාරකම් නිසා දේශපාලන විපර්යාස සිදුවන බව ප්‍රතික්ෂේප කරන ඩොනල්ඞ් ට්‍රම්ප්ට හිස වැල්ලේ සඟවා ගැනීමට සිදු වනු ඇතැයි ද එයිඩන් බෙල් තවදුරටත් පැවැසීය. 

දේශගුණික විපර්යාස සිදුවන්නේ මානව ක්‍රියාකාරකම් නිසා යැයි ලොව ප්‍රධාන පෙළේ විද්‍යාඥයන් පෙන්වා දී තිබෙන අතර ඇමෙරිකා ජනාධිපතිවරයා ඒ බව ප්‍රතික්ෂේප කරයි. විද්‍යාඥයන්ට දේශපාලන න්‍යාය පත්‍රයක් ඇතැයි ද ඇමෙරිකා ජනාධිපතිවරයා චෝදනා කරයි. 

(ඬේලිමේල් ඇසුරිනි -055)