ඇමෙරිකා ජනාධිපති ජෝ බයිඩන්, අප්‍රිකාවේ ඇන්ගෝලා රාජ්‍යයේ නිල සංචාරයක් ආරම්භ කළේය. 

බයිඩන් ඇමෙරිකන් ජනාධිපති ධුරයේ රැඳී සිටින්නේ තවත් සති කීපයක් පමණකි. ඇමෙරිකාවේ නව ජනාධිපති ලෙස එම ධුරයට තේරී පත් වී සිටින ඩොනල්ඩ් ට්‍රම්ප් දිවුරුම් දෙනු ඇත්තේ ලබන ජනවාරියේය.

82 හැවිරිදි බයිඩන්, ඇන්ගෝලාවේ ලුඇන්ඩා අගනුවරට ගියේ, අතරමඟදී, පැය කීපයක් ‘කේප් වර්ඩේ’ රාජ්‍යයේ ගත කරමිනි. කේප් වර්ඩේ යනු බටහිර අප්‍රිකාවට අයත් කුඩා දූපත් රාජ්‍යයකි. 

බයිඩන් තෙදිනක් ඇන්ගෝලාවේ ගත කිරීමට නියමිතය. ධවල මන්දිරය, බයිඩන්ගේ මෙම ඇන්ගෝලා සංචාරය සැලැසුම් කර තිබුණේ පසුගිය ඔක්තෝබරයේය. කෙසේ නමුත් ඇමෙරිකාවට ‘මිල්ටන්’ සුළි කුණාටුවෙන් බලපෑම් එල්ල වුණු බැවින්, සංචාරය පසුවට මෙම දෙසැම්බරයට කල් දැමුණි.

ඇමෙරිකාව සහ ඇන්ගෝලාව අතරේ වෙළෙඳ සබඳතා පැවැත්වෙයි. ඒ, ලොබීටෝ වරාය හරහාය. කොබෝල්ට් සහ තඹ ඇමෙරිකාවට අපනයනය සිදුවන්නේ මෙම වරාය හරහාය. බයිඩන්, ලොබීටෝ වරායේ නිරීක්ෂණ චාරිකාවක් යෑමට ද සූදානමින් සිටී. 2013 වසරේ සිට, ඇන්ගෝලාව ඇතුළු අප්‍රිකා රටවල් බොහොමයක වෙළෙඳ හවුල්කරු වී සිටින්නේ ඇමෙරිකාව නොව චීනයයි.

(ඒ.එෆ්.පී.)