ඇමෙරිකා ජනාධිපති ඩොනල්ඩ් ට්‍රම්ප් ලබන වසරේ අප්‍රේල් මාසයේදී චීනයේ සංචාරයක නිරත වනු ඇතැයි ධවල මන්දිර වාර්තා උපුටා දක්වමින් ඇමෙරිකන් මාධ්‍ය පවසයි.

ඇමෙරිකන් මාධ්‍ය වාර්තා කළේ චීන ජනාධිපති ෂි ජින්පින් සමඟ ඊයේ (25) දිනයේ පැවැත්වුණු දුරකථන සංවාදයකින් අනතුරුව ඇමෙරිකානු ජනාධිපතිවරයා මේ බව ප්‍රකාශ කර ඇති බවය.

ට්‍රම්ප්ගේ චීන සංචාරයෙන් අනතුරුව, ලබන වසර අවසානයේ, චීන ජනාධිපති ෂී ජින්පින්ට රාජ්‍ය සංචාරයක් සඳහා අමෙරිකාවට ආරාධනා කර ඇති බව ධවල මන්දිරය මේ වනවිට තහවුරු කර ඇත.

ඊයෙ (25) පැවැති එම දුරකථන සංවාදයෙන් අනතුරුව ඩොනල්ඩ් ට්‍රම්ප් විසින් සමාජ මාධ්‍ය තුළ සටහනක් තබමින් සඳහන් කර ඇත්තේ චීනය සහ ඇමෙරිකාව අතරේ හිතවත්කම් ශක්තිමත් වුණු බවත්, එය දිගටම ඒ අයුරින් පවතිනු ඇති බවත්ය.

දෙරටේ නායකයන් ඉතුක් ඔක්තෝබර් මාසයේදී දකුණු කොරියාවේ බුසාන් නුවර හමුදා කඳවුරකදී මුහුණට මුහුණ හමුවූ අතර, පසුව ඔවුහු එකිනෙකාට තීරුබදු පැනවීම පිළිබඳ එකඟතාවයකට පැමිණියහ. ඇමෙරිකාව සහ චීනය අතරේ සබඳතා පළුඳු වූයේ මෙම තීරු බදු හේතුවෙනි.