ලන්ඩන් නුවර සිට ඇමරිකාවේ ලොස් ඇන්ජලීස් නුවර දක්වා පියාසර කරමින් තිබූ ඇමරිකා ගුවන් සේවයට අයත් 109 යානය මගීන් කිහිප දෙනකු හා කාර්ය මණ්ඩලයේ පිරිසක් හදිසියේ අසනීප වීම හේතුවෙන් ආපසු ලන්ඩන් බලා පැමිණීමට තීරණය කළ බව විදෙස් පුවත් සේවා පවසයි.

යානය ගුවන්ගත කර පැය දෙකකට පමණ පසු අයිස්ලන්තයේ කෙෆ්ලැවික් ආසන්නයේදී බොහෝ පිරිසක් එක්වරම අසනීප වීම හේතුවෙන් යානයේ සිටි පිරිස බියට පත්වූ බවත් ඒ හේතුවෙන් යානය නැවත ලන්ඩන් බලා පියාසර කරවීමට ගුවන් නියමුවා තීරණය කර ඇති බවත් විදෙස් ආරංචි කියයි.

ඇමරිකන් ගුවන් සේවය ඊමේල් පණිවිඩයක් නිකුත් කරමින් පවසනුයේ මගීන් දෙදෙනකු හා යානයේ කාර්ය මණ්ඩලයේ කිහිප දෙනකු සිහිනැති ගතියකින් පෙළුණු බවට පැමිණිලි ලැබුණු බවයි. බ්‍රිතාන්‍ය ඩේලි ටෙලිග්‍රාප් පුවත්පත වාර්තා කර ඇත්තේ එක් ගුවන් සේවකයකු ක්ලාන්තවී ඇති බවයි.

යානයේ සිටි පිරිස අසනීප වීමට හේතුව නිෂ්චිතව තහවුරු කරගෙන නොමැති බවත් හිස කරකැවීම හා සිහිය නැතිවීම වැනි රෝග ලක්ෂණ පෙන්වීමට ඇතැම් විට ජෙට් එන්ජිමේ දුමාරය යානය ඇතුළතට කාන්දු වීම විය හැකි බවට සැක කෙරෙන බවත් හීතෘෘ ගුවන්තොටුපළ ආරංචි කියයි.