අලුතින් ‘කොවිඩ් 19’ ආසාදිතයන් වාර්තවීම සීඝ්‍රයෙන් අඩුවෙමින් පවතින බවත්, ‘කොවිඩ් 19’ වසංගතයේ අවසානයට අප පැමිණ සිටින බවත් ලෝක සෞඛ්‍ය සංවිධානයේ ප්‍රධානී ටෙඩ්‍රෝස් ඇඩ්හොම් ගෙබි්‍රයේසිස් කියයි.

ලෝක සෞඛ්‍ය සංවිධානයේ ප්‍රධානී ඇඩ්හොම් ගෙබි්‍රයේසිස් මෙසේ පැවැසුවේ ලෝක සෞඛ්‍ය සංවිධානය ලොව නන්දෙසින් ලබා ගත් දත්ත පාදක කර ගනිමිනි.

‘මා කියන්නේ නැහැ කොවිඩ් 19 වසංගතය අවසන් බව. ඒත් මා කියනවා අප කොවිඩ් 19 වසංගතයේ අවසානයට ඇවිල්ලා. කොවිඩ් 19 වයිරසය පාලනය කර ගැනීමේ හැකියාව දැන් අපට තිබෙනවා. එන්නත් තිබෙනවා. කවුරුත් යහපත් සෞඛ්‍ය පුරුදු අනුගමනය කරනවා.’ යැයි ජිනීවා නුවර පැවැති මාධ්‍ය හමුවේ දී ලෝක සෞඛ්‍ය සංවිධානයේ ප්‍රධානියා අවධාරණය කළේය.

‘කොවිඩ් 19’ වසංගතය ආරම්භ වූයේ 2019 වසර අවසානයේ චීනයේ හුබෙයි පළාතේ වූහාන් නගරයෙනි. වයිරසය ගෝලීය වසංගතයක් ලෙස ලොව පුරා ව්‍යාප්ත වීමට පටන් ගත්තේ 2020 වසරේය. තවමත් ‘කොවිඩ් 19’ ආසාදිතයන් සහ මරණ අතින් අංක එක ස්ථානයේ පසුවන්නේ ඇමෙරිකාවය.

(රොයිටර්)