නිරිත දිග බංගලාදේශයේ ඉදිකරමින් පවතින සිමෙන්නි කර්මාන්ත ශාලවක වහලය කඩා වැටීමෙන් 6 දෙනෙක් ජිවිතක්ෂයට පත්වි 60 කට වැඩි පිරිසකට තුවාල සිදුවි ඇතැයි විදෙස් මාධ්‍ය වාර්තා කරයි. බගර්හැටි දිස්ත්‍රික් රෝහලේ ප්‍රධාන කායික වෛද්‍යවරයා වන මොහමඩ්  බකීර් හුසේන් පවසා ඇත්තේ  තුවාල කරුවන් වැඩි දෙනෙකුගේ තත්වය බරපතල බවයි.

බංගලාදේශ සිවිල් ආර්ක්ෂක සහ ගිනි නිවීම් සේවාවේ සම්බන්ධිකාරක නිලධාරි මොහමඩ් නියැස්මුර් රහමාන් පවසා ඇත්තේ සුන්බුන් අතර සිරවි සිටි පුද්ගලයන් දෙදෙනෙක් නිරුපද්‍රිතව බේරාගත් බවයි. තවත් 30 දෙනෙක් පමණ සුන්බුන් අතර සිරවී සිටින බව විශ්වාස කෙරණ බවද රහමාන් පවසා තිබේ.

කුල්නා ප්‍රදේශයේ නියෝජ්‍ය පොලිස් ප්‍රධානි මොනි අස් ෂමාන් පවසා ඇත්තේ සිරවි සිටින ගණන ස්ථිර ලෙස ප්‍රකාශ කර නොහැකි බවයි. එහි වැඩ කරමින් සිටි සංඛ්‍යාව පිළිබඳ මෙතෙක් ස්ථිර තොරතුරු නැත.  මෙම කර්මාන්ත ශාලාව සේන කල්යන් සංස්ථා නැමැති සුභ සාධන සංවිධානයට අයත් බවද පැවසේ.

බංග්ලාදේශයේ කර්මාන්ත ශාලාවල මෙවැනි මාරක අනතුරු විම අළුත් දෙයක් නොවන බව ද එරට මාධ්‍ය වාර්තා කරයි. දරුණුම අනතුර සිදුවි ඇත්තේ 2013 අප්‍රේල් මස 24 වැනි දිනයි. එදින ඇඟළුම් කර්මාන්ත ශාලා පහක් පවත්වාගෙන යනු ලැබු තට්ටු නමයක ගොඩනැගිල්ලක් කඩා වැටීමෙන් 1100 ක් මියගියහ.