ඇමරිකා ජනපති බැරක් ඔබාමා ජපානයේ හිරෝෂිමාවේ සංචාරයක නිරතවීමට නියමිත බව එරට මාධ්‍ය වාර්තා කියයි. මැයි මස 21 සිට 28 දක්වා ආසියාවේ සංචාරයක නිරතවීමට ඔබාමා සැරසෙන අතර වියට්නාමයේද ඔහු සංචාරය කරයි.

ඇමරිකාව 1945 දී ජපානයේ හිරෝෂිමාවට න්‍යෂ්ටික බෝම්බ ප්‍රහාරයක් එල්ල කර මහත් විනාශයක් සිදු කිරීමෙන් පසු එහි සංචාරය කරන පළමු ඇමරිකා නායකයා ලෙස ඔබාමා ඉතිහාසගත වන බවද විදෙස් මාධ්‍ය වාර්තා සඳහන් කරයි.

හිරෝෂිමාවට 1945 අගෝස්තු 6 වැනිදා එල්ලවූ න්‍යෂ්ටික බෝම්බ ප්‍රහාරයෙන් 1,40,000කට වැඩි පිරිසක් ජීවිතක්ෂයට පත්වූහ. ඒත් සමගම ජපානයේ නාගසාකිවලට එල්ලවූ දෙවැනි න්‍යෂ්ටික බෝම්බ ප්‍රහාරයෙන් පසු දෙවැනි ලෝක යුද්ධය නිමාවට පත්කිරීමේ පියවර ගැනිණි.

ඔබාමාගේ සංචාරය හරහා එම න්‍යෂ්ටික ප්‍රහාරවලට සමාව ඉල්ලීමක් සිදු නොකෙරන බවද ධවල මන්දිර ආරංචි කියයි. ඔබාමාගේ සංචාරයේදී ජපාන අගමැති ෂින්සෝ අබේ සමග ලෝක සාමය වෙනුවෙන් න්‍යෂ්ඨික අවි වලින් තොර ලෝකයක් වෙනුවෙන් සාකච්ඡා හා එකඟතා ඇති කරගැනීමට නියමිත බව ඇමරිකා ජනපති මාධ්‍ය අංශය පවසයි.