උතුරු කොරියාව ජපානයට ඉහළින් මිසයිලයක් යවා තිබේ. ජපානයට මෙතෙක් කිසිදු ආකාරයකින් එල්ල නොවූ ආකාරයේ තර්ජනයක් යැයි ඊට ප්‍රතිචාර දක්වමින් ජපාන අගමැති ෂින්සෝ අබේ පැවැසීය.
 
කොරියානු වේලාවෙන් උදෑසන මෙම මිසයිලය දියත් කර තිබෙන අතර එය ජපානයට අයත් හොකයිඩා දූපතට ඉහළින් ගමන් කර පසුව මුහුදට කඩා වැටී තිබේ. උතුරු කොරියාව එලෙස මිසයිලයක් දියත් කිරීමත් සමඟ හදිසි රැස්වීමක් කැඳවීමට එක්සත් ජාතීන්ගේ ආරක්ෂක කවුන්සිලය තීරණය කර ඇතැයි ද වාර්තා විය. 
 
උතුරු කොරියාව මේ වසරේ ගත වූ මාස කිහිපයේදී මිසයිල අත්හදා බැලීම් රැසක් සිදු කළ අතර ජපානයට ඉහළින් ඔවුන් අත්හදා බැලූ මිසයිලයක් ගමන් කළ පළමු අවස්ථාව මෙය විය. මීට පෙර 1998 වසරේ දී සහ 2009 වසරේදී උතුරු කොරියාවට අයත් රොකට් දෙකක් ජපානයට ඉහළින් ගමන් කළේය. ඒවා ආයුද නොවන බවත් චන්ද්‍රිකා දියත් කරන යානා බවත් උතුරු කොරියාව එම අවස්ථාවලදී පැවැසීය. 
 
මෙම මිසයිලය න්‍යෂ්ටික යුද ශීර්ෂයක් රැගෙන යා හැකි තරම් බලසම්පන්න මිසයිලයක් යැයි බී.බී.සී පුවත් සේවය වාර්තා කර තිබිණි. උතුරු කොරියාව දියත් කරන ලද මෙම මිසයිලය කිලෝමීටර 2,700ක් ගමන් කළ බව වාර්තා විය. 
 
මෙම මිසයිලය උතුරු කොරියාව මෑතකදී අත්හදා බලන ලද ‘හ්වාසොන්ග් 12’ වර්ගයේ අන්තර්මැදි මිසයිලයක් යැයි ද පැවසේ. මිසයිලය කැබැලි තුනකට කැඩී ගොස් ජපාන වෙරළ තීරයේ සිට කිලෝමීටර් 1,180ක් දුරින් පිහිටි උතුරු ශාන්තිකර සාගරයට වැටී තිබේ. 
 
මිසයිල බිම හෙළීමට ජපානය කිසිදු පියවරක් ගෙන නොතිබූ නමුත් ජපාන බලධාරීන් එරට ජනතාවට අනතුරු ඇඟවීම් ලබා දී තිබිණි. 
 
(ඒ.එෆ්.පී/රොයිටර් 055)