අප්‍රිිකාවට අයත් උගන්ඩාවේ කම්පාලා අගනුවර කුණු කන්දක් නායයෑමට ලක්වීමෙන්, 18 දෙනෙක් මියගියහ. මියගිය එම 18 දෙනා අතරේ කුඩා දරුවෝ දෙදෙනෙක් සිටිති.

මෙම කුණු කන්ද වසර ගණනක් පැරණි එකක් බව මාධ්‍ය වාර්තා පෙන්වා දෙයි. පසුගිය දින කීපයේ නොකඩවා ඇද හැලුණු මහ වැසි, කුණු කන්ද නායයෑමට හේතුවක් වූ බව කම්පාලා නගර බලධාරීහු පවසති.

කුණු කන්ද නායයෑමෙන් එය පාමුල පිහිටි පැල්පත් නිවාස රැසක් කුණු තට්ටුවලින් වැසී ගියේය. අලුයම කාලයේ, නායයෑම සිදුවෙද්දී, පැල්පත් වැසියෝ නිදාගෙන සිටි බව ද පැවැසෙයි.

දිවි ගලවා ගැනීමේ මෙහෙයුම් කඩිනමින් ආරම්භ වූ අතර, සිරවී සිටි 14 දෙනකු බේරා ගැනීමට හැකියාව ලැබුණි. එසේ වුවත් තවත් බොහෝ දෙනකු කුණු තට්ටු අතරේ සිරවී සිටින බවත්, මරණ සංඛ්‍යාව තවත් ඉහළ යා හැකි බවත් පැවැසෙයි. කුණු තට්ටු ඉවත් කිරීමට බැකෝ යන්ත්‍ර ද යොදවා ඇත.

(ඒ.එෆ්.පී.)