උතුරුදිග සිරියාවේදී, සිරියානු ප්‍රජාතන්ත්‍රවාදී බලකායේ සහාය ඇතිව ඇමෙරිකා එක්සත් ජනපදය ක්‍රියාත්මක කළ තවත් මෙහෙයුමකින් ඉස්ලාමික් ස්ටේට් සංවිධානයේ මාධ්‍ය ප්‍රකාශකයා මරුමුවට පත්ව ඇතැයි වාර්තා වේ.

ජිහාද් නායක අබු බකර් අල් බැග්ඩෑඩිගේ මරණය නිවේදනය කර පැය කිහිපයකට පසු ඒ බව වාර්තා විය.

අයි.එස් හෙවත් ඉස්ලාමික් ස්ටේට් සංවිධානයේ ප්‍රකාශක අබු හසන් අල් මුජහිර් මරුමුවට පත්ව ඇතැයි කුර්දි සටන්කාමීන් ප්‍රමුඛ සිරියානු ප්‍රජාතන්ත්‍රවාදී බලකායේ නිලධාරියෙක් ද ඒ බව පැවැසීය.

තමන්ට ඒ සම්බන්ධයෙන් ප්‍රකාශ කිරීමට අවසරයක් නැති හෙයින් නම සඳහන් නොකරන ලෙස ද එම නිලධාරියා ඉල්ලීමක් කර තිබිණි. එම නිලධාරියා ඒ බව පැවසුවේ ඉතිරි වී සිටින අයි.එස්. නායකයන් ඉලක්ක කරගනිමින් මෙහෙයුම් ආරම්භ කර ඇති බවට සිරියානු ප්‍රජාතන්ත්‍රවාදී බලකායේ ප්‍රධානී මස්ලූම් අබ්දි පැවැසීමෙන් අනතුරුවය.

“අල් මුජහිර්” බැග්ඩෑඩිගේ දකුණු අත ලෙස සැලකුණු අතර ඔහු අයි.එස්. සංවිධානයේ ප්‍රකාශකයා ලෙස ද කටයුතු කළේය. ඔහු ජරාබ්ලස් ආසන්නයේ අයින් අල් බයාදා ගම්මානයේ සැඟවී සිටින බවට තොරතුරු ලැබී ඇති බවත් බුද්ධි තොරතුරු හුවමාරු කරගනිමින් ඇමෙරිකානු හමුදා සහ  සිරියානු ප්‍රජාතන්ත්‍රවාදී බලකායේ බුද්ධි අංශ මෙම මෙහෙයුම් දියත් කරන බවත් අබ්දි සඳහන් කළේය.

අයින් අල් බයාදා ගම්මානය පාලනය කරන්නේ තුර්කියේ සහාය ලබන සිරියානු කැරැලිකරුවන් වන අතර වාහන දෙකකට ගුවන් ප්‍රහාර එල්ල වූ බව එම ගම්මානයේ සිටින ප්‍රංශ පුවත් සේවයේ මාධ්‍යවේදියා පැවැසීය. කෙසේ නමුත් තමන්ට මළ සිරුරු හඳුනාගැනීමට නොහැකි වූ බව ඔහු සඳහන් කළේය.

එසේ වුවත් එම ප්‍රහාරයෙන් පැය කිහිපයකට පසු අයි.එස්. සංවිධානයේ ප්‍රකාශක අල් මුජහිර් මියගිය බව බි්‍රතාන්‍ය කේන්ද්‍ර කරගනිමින් ක්‍රියාත්මක වන මානව හිමිකම් නිරීක්ෂණය සඳහා වූ සිරියානු සංවිධානය නිවේදනය කළේය. සිරියානු ප්‍රජාතන්ත්‍රවාදී බලකායේ සහාය ඇතිව ඇමෙරිකා එක්සත් ජනපදය ක්‍රියාත්මක කළ මෙහෙයුමකින් ඔහු ඇතුළු අයි.එස්. සාමාජිකයන් පස්දෙනකු මියගිය බව එම සංවිධානය නිවේදනය කළේය.

මේ සිදුවීම්වලින් පසු ට්විටර් පණිවුඩයක් නිකුත් කළ සිරියානු ප්‍රජාතන්ත්‍රවාදී බලකායේ ප්‍රකාශක මුස්තාෆා බාලි, අයි.එස්. සංවිධානය නායකයා මියගොස් ඇතැයි විශ්වාස කරන බව පැවැසීය.

ඒ.එෆ්.පී. 

055