මැදපෙරදිග කලාපයේ උෂ්ණත්වය මේ දිනවල දිගෙන් දිගටම ඉහළ යාමේ නිසා මෙම රටවල වෙසෙන සියලු වැසියන් විවිධ අපහසුතාවයන්ට මුහුණ පාති. විශේෂයෙන්ම සෞදි අරාබිය , කුවේට් දේශය , බහරේන් යන රටවල පවතින අධික උෂ්ණත්වය හේතුවෙන් ගොඩනැගිලි කර්මාන්තයේ සහ අනිකුත් එළිමහන් ස්ථානවල රැකියාවන් කරන විදේශගත ශ්‍රමිකයින් අත් විඳින දුෂ්කරතාවයන් රාශියකි.

කුවේට් දේශය , සෞදි අරාබිය සහ බහරේන් මේ වනවිට උෂ්ණත්වය  සෙල්සියස් අංශක 50 සිට 55 දක්වා ඉහළ ගොස් ඇති අතර (හියුමිඩිටි) නොහොත් සාපේක්ෂ ආද්‍රතාවය ඉතා ඉහළ මට්ටමක පැවතීම නිසා එළිමහනේ ගැවසෙන සියලු දෙනා තෙතබරිත  වීම දැකගත හැකිය.

සෞදි අරාබිය සහ කුවේට් දේශයේ  මධ්‍යහන කාලයේදී අවු රස්මියෙන්  විවිධ පුද්ගලයන් විනෝදාස්වාදය සඳහා බිත්තර සහ පපඩම් බැදීමටද  පෙළඹෙමින් සිටින බව මේ දිනවල සමාජ වෙබ් අඩවි වලින් දැකගත හැකිය. අධික උෂ්ණත්වය හේතුවෙන් සෞදි අරාබි රජය විසින් මධ්‍යහන 12.00 සිට පස්වරු 3.00 දක්වා කාලයේ ගොඩනැගිලි කර්මාන්තයේ  සහ අනිකුත් එළිමහන් රැකියාවන් වල සේවකයන්  නිරත නොකරන ලෙස එම ආයතන  බලධාරීන් වෙත නියෝග පවා නිකුත් කර ඇත. අධික උෂ්ණත්වය මගින්  මිනිස් සිරුරට ඇතිවන හානි පිළිබඳව දැනුම්වත් කරමිනි.එම කාලය තුළ සේවයේ යෙදවීම දඩුවම් ලැබිය හැකි වරදක් බවද බලධාරීන් පවසයි. කෙසේ වුවද මෙම අති දුෂ්කර කාලය තවත් මාස තුනකින් නිමා වනු ඇත්තේ සීත කාලය උදාවීමත් සමඟය.