මහා භාණ්ඩාගාරයෙන් ඇමෙරිකානු ඩොලර් මිලියන 170ක මුදලක් අයථා ලෙස ලබාගනිමින් කරන ලද වංචාවක සැකකරුවකු ලෙස කතානායකවරයා නම් කරනු ලැබ තිබේ.

ඉන්දුනීසියාවේ දූෂණය තුරන් කිරීමේ කොමිෂන් සභාව මෙලෙස කතානායක සෙට්යා නොවැන්ටෝ මහතා සැකකරුවකු ලෙස නම් කර තිබෙන අතර ඔහුට අමතරව අධිකරණ අමාත්‍යවරයා, හිටපු අභ්‍යන්තර කටයුතු අමාත්‍යවරයා, ආණ්ඩුකාරවරුන් කිහිපදෙනකු සහ ජ්‍යෙෂ්ඨ දේශපාලනඥයන් කිහිපදෙනකුට ද චෝදනා එල්ල කර තිබේ.

සමාගමක් ස්ථාපිත කිරීම සඳහා කතානායකවරයා තම බලය සහ තනතුර අවභාවිත කර ඇතැයි කොමිසමේ සභාපති අගස් රහර්ද්ජෝ මහතා පැවැසීය.

ඉන්දුනීසියාවේ මිලියන 255ක් වන ජනතාවට හැඳුනුම්පත් ලබාදීමේ ව්‍යාපෘතියකින් අයථා ලෙස මුදල් වංචා කර ඇතැයි ද ඊට කතානායකවරයා ඇතුළු දේශපාලනඥයන් සම්බන්ධ වී ඇතැයි ද අදාළ සිදුවීම සම්බන්ධයෙන් පරීක්ෂණ පවත්වන බලධාරීහූ ප්‍රකාශ කරති.

“මෙම චෝදනා සියල්ල අසත්‍ය” යැයි කතානායකවරයා පුවත්පත් සාකච්ඡාවක් පවත්වමින් පැවැසීය.

ඇමෙරිකානු ඩොලර් මිලියන 443ක මුදලකින් තුනෙන් එකකට ආසන්න මුදලක් දේශපාලකයන් සහ ව්‍යාපාරිකයන් විසින් වංචා කරනු ලැබ තිබෙන අතර 2009 වසරේ සිට 2015 වසර දක්වා එම පිරිස අයථා ලෙස සමාගමක් ද පවත්වාගෙන ගොස් ඇතැයි ඉන්දුනීසියාවේ විශේෂ දූෂණ විරෝධී අධිකරණය ප්‍රකාශ කර තිබේ.

ඉන්දුනීසියාවේ කතානායකවරයා එරට පාලක පක්ෂය වන ගෝල්කාර් පක්ෂයේ සභාපතිවරයා වන අතර මෙම සිදුවීමේ සිව්වැනි සැකකරු ලෙස නම් කරනු ලැබ තිබේ. මෙම සිදුවීමත් සමඟ ජනාධිපති ජොකෝ විදෝදෝ මහතා දූෂණයට එරෙහිව දැඩි ක්‍රියාමාර්ග ගනු ඇත්දැයි යන්න සම්බන්ධයෙන් අවධානය යොමු වී තිබේ.

නොවැන්ටෝ මහතාට මීට පෙර ද දූෂණ චෝදනා එල්ල වූ එම චෝදනා හේතුවෙන් 2015 වසරේදී කතානායකධුරයෙන් ඉවත්වීමට ද සිදුවිය. එම දූෂණ චෝදනාවලින් නිදහස් වූ ඔහු 2016 වසරේ දී නැවතත් කතානායකධුරයට පත්විය.

රාජ්‍ය නොවන සංවිධානයක් වන ‘ට්‍රාන්ස්පේරන්ස් ඉන්ටර්නැෂනල්’ සංවිධානය වාර්ෂිකව නිකුත් කරන වාර්තාවට අනුව ඉන්දුනීසියාවට රටවල් 176ක් ඇසුරින් 90 වැනි ස්ථානය හිමි ව තිබේ. මෙම ශ්‍රේණිගත කිරීමේ පළමු තැනට පත්වන රට අඩුම දූෂිත රට ලෙස සැලකේ.

ඒ.එෆ්.පී 055