අල්කයිඩා නා ගනී

ලොවටම අඬබෙර ගසා පසුගියදා පිහිටැවු අල්කයිඩා ත්‍රස්ත සංවිධානයේ ඉන්දියා ශාඛාවේ සාමාජිකයෝ තමන් සිදුකළ පළමු මෙහෙයුමෙන්ම පරාජය වී ලොවම ඉදිරියේ විහිළුවක් බවට පත්ව ඇත.

සිදුවීමට පසුබිම සැකැසෙන්නේ නාවික යාත්‍රාවක් අත්පත් කර ගැනීමට සංවිධානයේ නායකයන් සකස් කළ සැළැසුමකිනි.

පකිස්තානයේ කරච්චි නුවර නැංගුරම් ලා ඇතැයි කියූ ඇමරිකා නාවික හමුදාවට අයත් යාත්‍රාවක් අත්පත් කර ගැනීමේ අරමුණින් ආයුධ සන්නද්ධ ත්‍රස්ත සාමාජිකයන් 10 දෙනෙක් පිටත් කර හැරීමට අල්කයිඩා සංවිධානයේ ඉන්දියා ත්‍රස්ත නායකයන් කටයුතු කර ඇත.

මෙහෙයුම පැවැරුණු සාමාජිකයන් දස දෙනාද කරච්චි නුවර නැව් තටාකාංගනයට ඇතුල්වී යාත්‍රාව තිබෙන්නේදැයි සොයාබැලීමේදී පසෙක නැංගුරම් ලා තිබූ යුද යාත්‍රාවක් ඔවුන්ගේ ඇස ගැටී ඇත.

තමන්ගේ ඉලක්කය එය යැයි සිතා යාත්‍රාව වෙත දිවගිය ඔවුන්ගේ අපේක්ෂාවන් කඩවී ඇත්තේ එය ඇමරිකාවට අයත් යාත්‍රාවක් නොව පකිස්තාන නාවික හමුදාවට අයත් සාමාන්‍ය යාත්‍රාවක් බව හදුනාගත් විටය.

ඒ වන විට පැන දීවීමට ප්‍රමාද වැඩිය.නාවික හමුදාවන්ගේ ප්‍රහාරයන්ට හසුව තිදෙනෙක් මරු දකිද්දී අනෙක් සත් දෙනා අත්අඩංගුවට පත්විය.

මේ සිදුවීමට ලොව පුරා මහත් ප්‍රසිද්ධියක් ලැබුණු අතර බොහෝ දෙනා ඉන්දියාවේද කලබල ඇති කරන්නේයැයි වහසි බස් දෙඩූ අල්කයිඩා නායකයින් සම්බන්ධයෙන් උපහාසාත්මක මුඛයෙන් අදහස් පළ කළහ.

සංවිධානය සිදුවීම සම්බන්ධයෙන් ප්‍රකාශයක් නිකුත් කළේද දින කිහිපයක් ගතවූ පසුය.එම ප්‍රකාශයට අනුව ඔවුන් කරච්චි වරායේ නැංගුරම් ලා තිබුණේ ඇමරිකා යුධ නැවක් යැයි තවමත් සිතා සිටින සෙයක් පෙනුණි.

අයිඑස්අයිඑස් අන්තවාදීන්ගේ කූටප්‍රාප්තිය හමුවේ අල්කයිඩා සංවිධානයට යන එන මං නැතිව තිබෙන බව ආරක්ෂක විශේෂඥයින්ගේ මතයයි.ඇමරිකා හමුදා එහි නායක ඔසාමා බින් ලාඩින් මරා දැමූ පසු සංවිධානයේ ක්‍රියාකාරකම් ගැන අසන්නට ලැබුණු නැති තරම් වේ.