ඉන්දුනීසියාව, මැලේසියාව සහ තායිලන්තය යන රටවල සතියක පමණ කාලයක් පැවති සුළිසුළං මගින් ඇති කළ අධික වර්ෂාව හේතුවෙන් පුද්ගලයන් 450ක් පමණ මිය ගොස් තිබෙන බව විදෙස් වාර්තා පවසයි. අයහපත් කාලගුණය හේතුවෙන් තුවාල ලැබූ ගණන 500 ඉක්මවා ඇත.

ඉන්දුනීසියාවේ සුමාත්‍රා හි සිදු වූ ගංවතුර සහ නායයෑම් හේතුවෙන් සිදුවූ මරණ සංඛ්‍යාව මේ වන විට 303 දක්වා ඉහළ ගොස් ඇත. එරට ආපදා කළමනාකරණ ඒජන්සිය පවසන පරිදි, තවත් පුද්ගලයන් 100කට වැඩි පිරිසක් තවමත් අතුරුදන්ව සිටින බැවින් මරණ සංඛ්‍යාව තවදුරටත් ඉහළ යනු ඇතැයි අපේක්ෂා කෙරේ. තවමත් බොහෝ සිරුරු සොයාගෙන නොමැති බව ද පැවැසෙයි.

බටහිර සුමාත්‍රාවේ පමණක් මරණ 61ක් සහ අතුරුදන් වූවන් 90ක් වාර්තා වූ අතර පුද්ගලයන් 75,219ක් අවතැන් වී ඇති අතර, 106,806කට බලපෑම් එල්ල වී කිබේ. උතුරු සුමාත්‍රාවේ තවත් 116 දෙනකු මිය ගොස් ඇති අතර, ඒෂ් ප්‍රාන්තයේ අවම වශයෙන් 35 දෙනකු මිය ගොස් ඇත.

තායිලන්තයේ දකුණු පළාත් අටක් පුරා අවම වශයෙන් පුද්ගලයන් 145 දෙනෙකුගේ මරණ තහවුරු වී ඇති බව පැවැසෙයි. ගංවතුර තත්ත්වය හේතුවෙන්  මිලියන 3.5කට අධික ජනතාවකට බලපෑම් එල්ල වී තිබේ. අසල්වැසි මැලේසියාවේ පුද්ගලයන් දෙදෙනකු මිය ගිය බව ද විදෙස් මාධ්‍ය වාර්තා පෙන්වා දෙයි.

දකුණු ආසියාව තුළ දිට්වා, සෙන්යාර්, කොටෝ නම්වලින් දුර්ලභ සුළිසුළං තුනක පොකුරක් ඇතිවීම මෙම අයහපත් කාලගුණයට හේතුව බව පැවැසෙයි. මෙම පද්ධති බෙංගාල බොක්ක, මලක්කා සමුද්‍ර සන්ධිය සහ දකුණු චීන මුහුදේ දී ඇතිව ගමන් කරමින් පවතී.