40ක් මරා විදුලි රැහැනේ එල්ලයි

ඉරාකයේ මොසුල් හී සිවිල් වැසියන් 40 දෙනකු මරා විදුලි රැහැන් වල එල්ලා ඇතැයි වාර්තා වෙයි.අයි එස් ත්‍රස්තවාදීන් විසින් මෙය කරන්නට ඇතැයි එක්සත් ජාතීන්ගේ සංවිධානය සැක කරයි.

අයි එස් ත්‍රස්තයින් විසින් ඇති කරගත් ස්වයං අධීකරණ වල නියෝග මත මෙම ඝාතන සිදුකරන බව එම සංවිධානය පවසයි.‘රාජද්‍රෝහී චෝදනා මත‘ යැයි කියමින් එම වැසියන් ඝාතනය කර ඇති බව කියයි.

‘ද්‍රෝහීයෝ‘ හා ‘ඉරාක ආරක්ෂක හමුදා නියෝජිතයෝ“ යන වචන සහිත තැඹිලි පැහැති ඇඳුම් අන්දවා ඔවුන් ඝාතනය කර ඇත.

ජංගම දුරකථන භාවිතයට එරෙහිව අයි එස් ත්‍රස්තයින් පැනවූ තහනම නොතකා ජංගම දුරකථනයක් භාවිත කළැයි සිවිල් වැසියෙකුට ප්‍රසිද්ධියේ වෙඩි තබා ඇති බවද වාර්තා වෙයි.

මානව හිමිකම් හා යුද නිති උල්ලංගනය කරමින් දරුවන්,කාන්තාවන් ඝාතනය කිරිමත් ඒවා වීඩියෝ පට ඔස්සේ ප්‍රචාරය කිරීමත්   ශෝකයෙන් යුතුව හෙළා දකින බව එක්සත් ජාතීන්තේ සංවිධානය පවසයි.

නැවත මෙවන් සිදුවීම් නොවීමට අයි එස් පාලනයෙන් මුදාගත් ප්‍රදේශ වල නීති ක්‍රියාත්මක කරන ලෙස එම සංවිධානයේ මානව හිමිකම් මහ කොමසාරිස් සෙයිද් අල් හුසේන් ඉරාක රජයෙන් ඉල්ලා සිටියේය.

රසායනික අවි සඳහා යොදාගත් සල්ෆර් හා ඇමෝනියා ගබඩා රැසක් එම ප්‍රදේශ වල ඇති බවද කියයි.

මොසුල් නගරය 2014 දී අයි එස් ත්‍රස්තයින් පාලනයට නතු වූ අතර  මේ වන විට නගරය මුදාගැනීමට ඉරාක හමුදා මෙහෙයුම් දියත් කර ඇත.

(අයි එස් ත්‍රස්තයින් භාවිත කර අතහැර දැමූ නිවසක්)

(අයි එස් ත්‍රස්ත පාලනය යටතේ සිදුවූ විනාශය)

(ඡායාරූප-රොයිටර් පුවත්)