සිරියානු තුර්කි දේශසිමාවට යාබද තුර්කියේ රෙහාන්ලී නමැති නගරයේ පෙරේදා (11) අධි බලැති කාර් බෝම්බ දෙකක් පුපුරා යෑමෙන් 40 දෙනෙක් ජීවිතක්ෂයට පත්වූහ. තුවාල ලැබූ ගණන 140 කි.
රෙහාන්ලී නගරය පිහිටා ඇත්තේ දකුණු දිග තුර්කියේ හටේයි නමැති පළාතේය. තුර්කි ආරක්ෂක අංශ නිවේදනය කළේ පළමු බෝම්බය පිපිරී විනාඩි 15 ක් යද්දී දෙවැනි බෝම්බය පුපුරා ගිය බවය. 
තුවාල ලැබූවන්ගෙන් 29 දෙනකුගේ තත්ත්වය බරපතළ බව රෝහල් ආරංචි මාර්ග පවසයි. බෝම්බ පිපිරීමෙන් ගොඩනැගිලි සහ නිවාස කිහිපයක් මුළුමනින්ම බිමට සමතලා වී ගියේය.
එය තුර්කි ‘ත‍්‍රස්තවාදීන්ගේ’ කි‍්‍රයාවක් නමුත් සිරියානු රජය සහ බුද්ධි අංශය ඒ පසුපස සිටිනවා යැයි තුර්කි රජය චෝදනා කරයි. කලක් සිරියානු ජනපති බෂීර් අල් අසාද්ගේ සමීපතම මිතුරා වූ තුර්කිය සිරියානු කැරැල්ල ඇරැඹි අවස්ථාවේ සිට සහාය දෙන්නේ කැරැුලිකාර පාර්ශ්වයටය. එම හේතුව නිසා තුර්කියත් සිරියානු රජයේ සතුරකු විය.
පෙරේදා සිදුවුණු එම බෝම්බ පිපිරීම හේතුවෙන් සිරියානු අර්බුදයට තුර්කිය සෘජුව මැදිහත් වීමේ අවදානමක් පවතී. තුර්කිය නේටෝ සාමාජිකයෙකි. නේටෝ සාමාජික රටකට සතුරු ප‍්‍රහාරයක් එල්ල වුවහොත් සෙසු සාමාජික රටවල් ද එම රට ආරක්ෂා කර ගැනීමට සටන් කිරීමට බැඳී සිටී.
දැනටමත් නේටෝවේ ප‍්‍රබල සාමාජිකයන් වන ඇමෙරිකාව, බි‍්‍රතාන්‍යය සහ ප‍්‍රංශය චෝදනා කරන්නේ සිරියානු රජය රසායනික අවි යොදා ගනිමින් කැරැලිකරුවන්ට පහර දෙන බවත් එයින් සිවිල් වැසියන් මියයන බවත්ය.
මේ අතර ඇමෙරිකාවේ මිතුරා වන ඊශ‍්‍රායලය ද සිරියාවට පහර දීම ආරම්භ කර ඇත. පසුගිය 4 වැනිදා සිරියාවේ ඩමැස්කස් අගනුවර ඇතුළු තවත් නගර කිහිපයකට ඊශ‍්‍රායල ගුවන් හමුදාව ප‍්‍රහාර එල්ල කළේය. මීට මාස 4 කට පෙර ද ඊශ‍්‍රායලය සිරියාවේ ආයුධ ගබඩාවකට පහර දී විනාශ කළේය. 
ඊශ‍්‍රායලය චෝදනා කරන්නේ සිරියා රජයේ මිතුරා වන ලෙබනනයේ හිස්බුල්ලා සටන්කාමීන්ට ආයුධ දීමට බලයෙන් ඉවත් වීම ප‍්‍රතික්ෂේප කරන සිරියානු ජනාධිපති බෂීර් අල් අසාද්ගේ රජය කටයුතු කරන බවත් එය නැවැත්වීමේ අරමුණින් තමන් සිරියාවේ ආයුධ ගබඩා කීපයකට පහර දුන් බවත්ය. 
හිස්බුල්ලා සංවිධානයට අයත් වන්නෝ ෂියා මුස්ලිම් සටන්කාමීහුය. හිස්බුල්ලා සංවිධානය ඊශ‍්‍රායලයේ පරම සතුරා වන ඉරානයේ ද සමීප මිතුරෙකි. සිරියා රජය පෙරළා දැමීමට ආයුධ අතට ගෙන සිටින කැරැුලිකරුවන්ට එරෙහිව සිරියා රජයට සහාය දෙන්නේ හිස්බුල්ලා සටන්කාමීන්ය.