නිමල කොඩිතුවක්කු

වයස අවුරුදු 5 ට අඩු ළමයින් අතර උග්‍ර මන්දපෝෂණයේ වැඩිවීමක් දක්නට ලැබෙන බවත් අයවැයෙන් ළමා පෝෂණය වැඩිදියුණු කිරීමට පොරොන්දු වුවත් එය ක්‍රියාත්මක කිරීමට ප්‍රතිපාදන ලබාදී නොමැති බවත් වෙරිටේ රිසර්ච් ආයතනය පවසයි.

තෝරාගත් දිස්ත්‍රික්ක හයක උග්‍ර මන්ද පෝෂණය සහිත දරුවන් 5640ක් හඳුනාගෙන දරුවකුට මසකට රුපියල් 15000 බැගින් මාස හයක කාලයක් සඳහා මූල්‍ය ආධාර සැපයීමට අයවැය මගින් යෝජනා කළත් එම යෝජනාව ක්‍රියාත්මක කිරීමට මුදල් අමාත්‍යාංශයෙන් මුදල් නිකුත් කර නොමැති බව ද වෙරිටේ රිසර්ච් පර්යේෂණ ආයතනයේ ජ්‍යෙෂ්ඨ පර්යේෂණ විශ්ලේෂක සුරේනි වීරතුංග මහත්මිය පැවසුවාය.
පෝෂණ අතිරේක වැඩසටහන් ශක්තිමත් කිරීම වෙනුවෙන් රුපියල් කෝටි 50 ක මුදලක් ලබාදෙන බවට අයවැයෙන් යෝජනා කර තිබිණ.
මෙයට අමතරව සමෘද්ධි වැඩිහිටි විවිධ ආබාධ ඇති පුද්ගලයන්ගේ හා වකුගඩු රෝගීන්ගේ වැඩි කරන ලද දීමනා අඛණ්ඩව ලබාදීම ආදී යෝජනා සඳහා ප්‍රගතිය හෙළිකිරීමට රජය අපොහොසත්ව ඇතැයි ද වීරතුංග මහත්මිය පැවසුවාය. අයවැය සඳහා වෙන් කළ මුදලින් කෝටි 4400ක හෙවත් සමස්ත මුදලෙන් සියයට 89ක ප්‍රගතිය පිළිබඳ තොරතුරු ලබාදීමට රජය අපොහොසත්ව ඇතැයි ද ඇය සඳහන් කළාය.
අයවැය වර්ෂය අවසාන වන විට සම්පූර්ණයෙන් ඉටු කර ඇත්තේ පොරොන්දුවලින් පහෙන් එකකටත් වඩා අඩු ප්‍රමාණයක් පමණක් බවත් සුරේනි වීරතුංග මහත්මිය 
තවදුරටත් පැවසුවාය.