සුජිත් හේවාජුලිගේ

ජනාධිපතිවරණයට ඉදිරිපත් වූ ජනපති අපේක්ෂකයන්ගෙන් විස්සකට ආසන්න සංඛ්‍යාවක්  ඉදිරි මහ මැතිවරණයට ඉදිරිපත්වීමට සූදානම් වෙමින් සිටින බව බුද්ධි අංශ සහ දේශපාලන ආරංචි මාර්ගවලින් පැවසෙයි.

ජනපතිවරණයට ඉදිරිපත්වීමෙන් ගන්නා ප්‍රසිද්ධියෙන් මහ මැතිවරණයට ඉදිරිපත් වීම සඳහා පදනම හදාගැනීම අපේක්ෂකයන් බහුතරයකගේ අරමුණවී ඇතැයිද එම ආරංචි මාර්ග සඳහන් කළේය.

මීට අමතරව තවත් අපේක්ෂකයන් කිහිප දෙනෙකු ආණ්ඩුකාර පදවි සහ සංස්ථා හෝ වෙනත් ආයතන සභාපතිකම් හෝ මුල් පුටු ලබා ගැනීමට අපේක්ෂා කරමින් සිටින බව බුද්ධි අංශ පවසයි. තවත් අය වෙනම දේශපාලන පක්ෂ පිහිටුවා ගැනීමට ද අරමුණු කරගෙන සිටින බව වාර්තාවේ.

ජනාධිපතිවරණයට ඉදිරිපත් වූ අපේක්ෂකයන් 38 දෙනාගෙන් පහළොවකට වැඩි පිරිසක් කිසිදු ප්‍රචාරක කටයුත්තක නියැලී නැතැයි මැතිවරණ නිරීක්ෂණ සංවිධාන පවසයි.

වෙනත් අපේක්ෂකයන් ප්‍රවර්ධනය කිරීම සම්බන්ධයෙන් චෝදනා එල්ලවූ ජනාධිපති අපේක්ෂකයන් සංඛ්‍යාව හතරකි. සිඩ්නි ජයරත්න, ප්‍රේමසිරි මානගේ, වික්ටර් ඇන්තනි සහ  කේ.කේ. පියදාස එම අපේක්ෂකයෝ වෙති.