බඩු මිල ඉහළ යෑම සියයට අසූවක්

සුජිත් හේවාජුලිගේ

කොළඹ ආහාර උද්ධමනය (ආහාර ද්‍රව්‍ය මිල ඉහළ යෑම) සියයට අසූවක් දක්වා ඉහළගොස් ඇතැයි කොළඹ පාරිභෝගික මිල දර්ශකය පෙන්වා දෙයි.   

රටේ පසුගිය 2022 මැයි මාසයේදී සියයට 58ක් ලෙස පැවැති ආහාර උද්ධමනය ජුනි මාසයේ දී සියයට 75.8 දක්වා ඉහළ ගොස් ඇති බවද එම දර්ශකය සඳහන් කරයි.   

මේ අතර ශ්‍රී ලංකාවේ ලක්ෂ 57ක පමණ පිරිසක් ප්‍රමාණවත් ආහාර වේලක් නොමැති තත්ත්වයක පසුවන බව ලෝක ආහාර වැඩ සටහන නිකුත් කළ වාර්තාවක දැක්වේ.   

එසේම ඔවුන් මානුෂීය ආධාර අවශ්‍ය පසුබිමක සිටින බවද එම වාර්තාව සඳහන් කරයි.   

කෝටි දෙකක ජනගහණයක් සිටින ශ්‍රී ලංකාවේ වසර 70ක් තුළ උදා වූ දරුණුතම ආර්ථික අර්බුදය විසින් ගෙන එන ලද දුෂ්කරතාවලට ජනතාව මුහුණ දෙමින් සිටින බව ලෝක ආහාර වැඩ සටහන පවසයි.   
මේ අතර ආර්ථික අපහසුතා හේතුවෙන් තම දෛනික ජීවිතයේ ආහාර අවශ්‍යතාව සපුරා ගැනීමට හැකියාවක් නොමැතිව ඉතා දුෂ්කර තත්ත්වයන්ට මුහුණ දෙන බොහෝ පවුල් සම්බන්ධ මාධ්‍ය වාර්තා මේ දිනවල සුලභව පළවෙමින් ඇත.