ඉන්දික හේවාවිතාරණ
එක් පන්න ක්‍රමයක් මගින් පමණක් බහුදින යාත්‍රා හිමියන් මත්ස්‍යයින් ඇල්ලිය යුතු බවට අලු‍තින් නීතියක් සකස් කර තිබෙන බවත්, මෙම නීතිය ක්‍රියාත්මක කළ පසු මෙරට බහුදින යාත්‍රා ධීවර කර්මාන්තය දැඩි අර්බුදයකට ලක්වන බවත්, බහුදින යාත්‍රා හිමියන්ගේ ජාතික මධ්‍යස්ථානය සඳහන් කරයි.

දැනට යාත්‍රා ගමන් කරන ප්‍රදේශවල මත්ස්‍යයන් ගැවසෙන ආකාරය සලකා බලා කඳන් කෝස් දැල් ක්‍රමය හා ලොන් ලයින් දැල්, අතංගුව සහ කරමල් දැල් භාවිත කරමින් බහුදින යාත්‍රා මගින් අස්වැන්න නෙළාගනිමින් තිබෙන බවද එම මධ්‍යස්ථානයේ ජාතික සංවිධායක අජිත් නිශාන්ත සඳහන් කළේය. එහෙත් මින් ඉදිරියට එක් පන්න ක්‍රමයක් මගින් පමණක් මත්ස්‍ය අස්වැන්න නෙළාගැනීමට බලපත්‍ර නිකුත් කිරීමට සැලසුම් කර තිබෙන බවද ඔහු පැවසීය.
මේ අනුව බහුදින යාත්‍රාව ගමන් කරන මාර්ගයේදී අදාළ පන්න ක්‍රමය මගින් මසුන් අල්ලා ගැනීමට නොහැකි වුවහොත් යාත්‍රා හිමියන්ට රුපියල් ලක්ෂ ගණන් පාඩු විඳීමට සිදුවේ. 
ඉන්ධන මිල අධික ලෙස ඉහළ යාම හා අයිස් මිල ඉහළ යාම, යාත්‍රා නඩත්තුවට විශාල මුදලක් වැය කිරීමට සිදුවීම හා ලැබෙන අස්වැන්නට නිසි මිලක් නොමැති වීම නිසා බහුදින යාත්‍රා හාර දහස් තුන්සියයකට අධික ප්‍රමාණයෙන් යාත්‍රා දෙදහසකට ආසන්න ප්‍රමාණයක් මේ වනවිට කර්මාන්තයේ නිරත නොවන තත්ත්වයක් උද්ගත වී ඇත. එවන් තත්ත්වයක් තුළ අලු‍තින් නීති පැනවීමට කටයුතු කිරීමෙන් සිදුවන්නේ බහුදින යාත්‍රා ධීවර කර්මාන්තය තවදුරටත් අර්බුදයකට ලක්වීමය.
අඩි 40කට වැඩි දිගින් යුත් බහුදින යාත්‍රාවක් වරායක් තුළ නවතා තැබීම වෙනුවෙන් රුපියල් දෙදහස් දෙසීයක මුදලක් මාසිකව ගෙවීමට සිදුව තිබෙන බවත්, යාත්‍රාවක් වරායක නවතා තිබුණත් යාත්‍රා නියාමන පද්ධතියට වසරකට රුපියල් හැට දහසකට අධික මුදලක් ගෙවීමට සිදුවන බවත් බහුදින යාත්‍රා හිමියන්ගේ ජාතික මධ්‍යස්ථානයේ ජාතික සංවිධායකවරයා සඳහන් කරයි. යාත්‍රා නියාමන පද්ධතියක් බහුදින යාත්‍රාවකට අලු‍තින් සවිකිරීම සඳහා රුපියල් නව ලක්ෂ තිස් දහසක මුදලක් ගෙවීමට සිදුව තිබෙන බවත්, ඊට අමතරව අදාළ පද්ධතිය නඩත්තුවට ද සැලකිය යුතු මුදලක් වැය කිරීමට සිදුව තිබෙන බවත් ඔහු පවසා සිටී.