(බිමල් ශ්‍යාමන් ජයසිංහ)
 
හිස් බීම බෝතල් ප්‍රවාහනය කරන මුවාවෙන් බුරුත කඳන් තොගයක් ලොරියකින් ප්‍රවාහනය කළ පුද්ගලයන් දෙදෙනෙකු මිල්ලගස් හන්දියේදී අත්අඩංගුවට ගත් බව පානදුර කොට්ඨාස රථ වාහන අංශය පවසයි.

එම බුරුත දැව තොගය රුපියල් ලක්ෂ 15කට අධික වටිනාකමින් යුතු බවත්, බුරුත කඳන් 150කට අධික ප්‍රමාණයක් තිබූ බවත් පොලිසිය කියයි.

රත්නපුර සිට පැමිණෙමින් තිබූ ආවරණය කරන ලද ලොරිය සම්බන්ධයෙන් ඇති වූ සැකයක් මත හොරණ පොකුණුවිට හන්දිය ආසන්නයේ රාජකාරියේ යෙදී සිටි පොලිස් නිලධාරීහු ලොරිය හඹාගොස් එය නවතා පරීක්ෂා කළහ.

ලොරියේ රියැදුරු සහ සහයකවරයා ලොරියේ ඇත්තේ හිස් බීම බෝතල් බවත් ඒවා කඩුවෙල බීම කර්මාන්ත ශාලාවකට ගෙන යන බවත් පවසා තිබිණි. එය පිළිනොගත් පොලිස් නිලධාරීහු ලොරිය පරීක්ෂා කිරීමේදී මෙම බුරුත දැව තොගය එහි සඟවා තිබියදී සොයාගෙන ඇත.