(කේ බුද්ධික කුමාරසිරි)

පාදුක්ක රෝහලේ කාර්ය මණ්ඩලය අද (31) උදෑසන සිට රාජකාරී වලින් ඉවත් වී විරෝධතාවක නිරත වුහ.

රිය අනතුරකින් මියගිය තරුණයකුගේ සිරුර බැලීමට පාදුක්ක රෝහලට පැමිණි පුද්ගලයකු රෝහල් මුරකරුවකුට පහරදිම හේතුවෙන් එයට විරෝධය පාමින් සැකකරු අත් අඩංගුවට ගන්නැයි ඉල්ලා මෙලෙස විරෝධතාවයේ නිරත වෙති.

හයිලෙවල් මාර්ගයේ පාදුක්ක මාවතගම ප‍්‍රදේශයේදී ති‍්‍රරෝද රථයක් සහ ලොරි රථයක් මුහුණට මුහුණ ගැටීමෙන් පෙරේදා (30) රාති‍්‍ර සිදු වූ අනතුරකින් ති‍්‍ර රෝද රථය පැද වූ තරුණයකු එම ස්ථානයේම මිය ගොස් ඇති තිබේ.

පසුව ප්‍රදේශවාසීන් එක්ව දේහය පාදුක්ක ප‍්‍රාදේශීය රෝහලට රැගෙන ආ බවත් එම අවස්ථාවේදී පාදුක්ක රෝහලට විශාල ජනතාවක් පැමිණ ඇති අතර ඒ සියළු දෙනාට දේහය පෙන්වා රාති‍්‍ර 9ට පමණ දේහය රෝහලේ මෘත ශරීරාගාරයට ඇතුළත් කර ඇති බවද විරෝධයේ නිරත පිරිස පවසති.

එලෙස රාති‍්‍ර මෘත ශරීරාගාරයට දේහය ඇතුළත් කළ පසු පැමිණ පහරදීමට සම්බන්ධ සැකකරු තමන්ට දේහය බැලිමට අවශ්‍ය බව පවසා ඇති මුත් පහරකැමට ලක් වූ මුරකරු පවසා ඇත්තේ මෘත ශරීරාගාරයට දේහයක් ඇතුළත් කළ පසු තමන්ට එය යළි විවෘත කර පෙන්වීමට නොහැකි බැවින් ප‍්‍රධාන වෛද්‍යවරයා හමු වී අවසර ලබා ගෙන පැමිණන ලෙස පුද්ගලයාට දැනුම් දී තිබේ.

එහෙත් එයින් උරණ වූ සැකකරු තම රෝහලේ සහෝදර සේවකයාට යතුරුපැදි හිස් ආවරණයකින් පහරදි ඇති බවත් පහරකෑමට ලක් වූ සේවකයා රෝහලේ ප‍්‍රතිකාර ලබමින් පවතී.

සිද්ධිය සම්බන්ධයෙන් පාදුක්ක පොලිසිය වැඩිදුර පරීක්ෂණ පවත්වයි.