(දයාරත්න ඇඹෝගම)

අනුරාධපුරයේ සිට කළුතර බලා ගමන් ගනිමින් තිබු වැන් රථයක් නාච්චාදුව හන්දිය ආසන්නයේ කාර්මික දෝෂයක් නිසා නවතා තිබු බස් රථයක පසුපස ගැටිමෙන් වැන් රථයේ ගමන් ගත් 69 හැවිරිදි පුද්ගලයෙකු මිය ගොස් තවත් 11 දෙනෙකු   බරපතල තුවාල ලබා ඇතැයි කවරක්කුලම පොලිසිය කියයි.

මෙසේ මිය ගොස් ඇත්තේ කැකිරාවේ පදිංචි එච්.එම්.ප්‍රේමරත්න(69)හැවිරිදි පුද්ගලයෙකි.

වැන් රථයේ ගමන් ගත් මෙම පිරිස කළුතර ප්‍රදේශයේ පදිංචි නෑදැයන් පිරිසක් බව පොලිසිය කියයි. ඔවුන් කළුතර සිට අනුරාධපුර අටමස්ථානය වැද පුදා ගෙන සිය නිවෙස් බලා යමින් සිටියදි මෙම අනතුරට ලක්වි තිබේ.

වැන් රථය අනතුරට පත්විමෙන් මිය ගිය පුද්ගලයාට අමතර   කුඩා දරුවන් පස් දෙනෙකුත් කාන්තාවන් සිවු දෙනෙකු හා පිරිමි පුද්ගලයන් දෙදෙනෙකුත් බරපතල තුවාල ලබා අනුරාධපුර ශික්ෂණ රෝහලට ඇතුලත් කොට තිබේ.වැන් රථයේ රියදුරාද තුවාල ලැබුවන් අතර සිටිති.

වැන් රථයේ රියදුරා මේවන විට අනුරාධපුර ශික්ෂණ රෝහලේ දැඩි සත්කාර ඒකකයේ ප්‍රතිකාර ලබති. සිද්ධිය සම්බන්ධයෙන් කවරක්කුලම පොලිසියේ ස්ථානාධිපති ඒ.කේ.හේරත් මහතා ඇතුළු පොලිස් නිලධාරිහු පිරිසක් වැඩිදුර පරික්ෂණ පවත්වති.