( තිළිණි ද සිල්වා )
 
මෙරට විශ්‍රාම වැටුප් ලබන ජනගහනය හය ලක්ෂයේ සීමාව ඉක්මවා ඇතැයි විශ්‍රාම වැටුප් දෙපාර්තමේන්තුව විසින් ප්‍රකාශයට පත් කර ඇති නවතම සංඛ්‍යාලේඛනවල සදහන්ව ඇත.

ඒ අනුව 2017 වසර අවසාන සංඛ්‍යාලේඛනවලට අනුව එම ප්‍රමාණය 600,867 ක්වූ අතර මේ වසරේ ජනවාරි සිට  ඔක්තෝබර් මාසය අවසානයේ දී එය 614,288 ක් දක්වා වර්ධනය වී තිබෙන බව එම දෙපාර්තමේන්තු වාර්තා වල සදහන් වේ.

මේ අතර 2017 වසර තුළ දී විශ්‍රාමික ජනතාව වෙනුවෙන් ගෙවා ඇති විශ්‍රාම වැටුප් හි සමස්ත වටිනාකම රුපියල් බිලියන 181 කි.

2018 ඔක්තෝබර් මාසය තුළ දී විශ්‍රාම වැටුප් වශයෙන් ගෙවා ඇති මුදල රුපියල් බිලියන 15 ක් ලෙසින්ද එම වාර්තාවේ වැඩිදුරටත් සදහන්ව ඇත.

සමස්ත විශ්‍රාම වැටුප් ලබන ජනතාවගෙන් සියයට 21.9ක් රු. 30,000 ට වැඩි වැටුපක් ලබන බවත්, සියයට 41.1ක්   රු. 20,000 ත් රු. 30,000 ත් අතර වැටුපක් ලබන බව සහ තවත් සියයට 37.1ක් ලබන වැටුප රු. 20,000 ට වඩා අඩු බවත් මෙම සංඛ්‍යාලේඛන පෙන්වා දේ.