විනීතා එම් ගමගේ
 
තම අභිමතයට කටයුතු නොකර ආණ්ඩුක‍්‍රම ව්‍යවස්ථාවට අනුව කටයුතු කරන්නැයි කථානායකවරයා ගෙන් කාරුණිකව ඉල්ලා සිටින බව ක‍්‍රීඩා පළාත් පාලන සහ පළාත් සභා අමාත්‍ය ෆයිසර් මුස්තාපා මහතා ප‍්‍රකාශ කළේය.

පාර්ලිමේන්තුව 14 වැනිදා රැස්වූ විට ව්‍යවස්ථාව අනුව කටයුතු කරනු ඇති බවත් අග‍්‍රාමාත්‍යවරයාගේ සිට ඇමැති මණ්ඩලය දක්වා අවශ්‍ය පරිදි ආසන පැනවීමට පාර්ලිමේන්තුව කටයුතු කරනු ඇතැයි ද අමාත්‍යවරයා කීය. 

එසේ ව්‍යවස්ථාවට අනුව කටයුතු කළොත් කිසිදු ගැටලූවක් ඇති නොවන බව ද හෙතෙම කියා සිටියේය. 

කැබිනට් මණ්ඩලයක් සාමාජිකයින් 30 ට සීමා විය යුතු අතර සම්මුතිවාදි ආණ්ඩුවක දී එම සීමාව ඉක්මවා කටයුතු කළ හැකි බව ද පැවැති රජය එසේ සම්මුතිවාදී  ආණ්ඩුවක් ලෙස ඇමැතිවරු 30 කට වඩා සිටි කැබිනට් මණ්ඩලයක් පවත්වා ගෙන ගිය බවත් පෙන්වා දුන් මුස්තාපා මහතා එහි පාර්ශවකරුවන් වූ එක්සත් ජනතා නිදහස් සන්ධානය ඉන් ඉවත් වන බව ලිඛිතව දැන්වීමෙන් පසු 30 කට වඩා අමාත්‍යවරු සිටින බැවින් එම කැබිනට් මණ්ඩලය අහෝසි වන බව ද අමාත්‍යවරයා පෙන්වා දුන්නේය. 

ඒ අනුව අමාත්‍ය මණ්ඩලයක් නැතිව අගමැතිවරයෙක් ද සිටිය නොහැකි බවත් ඔහු වැඩිදුරටත් කියා සිටියේය. 
ෆයසිර් මුස්තාපා මහතා මේ අදහස් පළ කළේ ශ්‍රී ලංකා නිදහස් පක්ෂ මුලස්ථානයේ අද (9) පැවැති මාධ්‍ය හමුවක් අමතමිනි. 

එම මාධ්‍ය හමුව ඇමතූ අධ්‍යාපන හා උසස් අධ්‍යාපන රාජ්‍ය අමාත්‍ය මොහාන් ලාල් ගේ‍්‍රරෝ මහතා පැවසුවේ සිදුවූ දේශපාලන වෙනස්කම් හමුවේ අගමැතිවරයා ඉවත් කරන්නට වුවමනා නොවන අතර ඉබේම ඉවත්වන බවකි.

මේ වනවිට තේරුමක් නැති ප්‍රශ්න රාශියක් රට පුරා පැතිර ඇති බවත් රටේ සංවර්ධනය නැවතී ඇති බවත් පැවසූ රාජ්‍ය අමාත්‍යවරයා කළ හැකි දේ කළානම් කාටත් හොඳ යැයි ද පැවසීය. 

විශ්වාසය පිළිබඳ කරුණු ගෙන බැලූ විට වැදගත් වන්නේ ජනතා විශ්වාසය යැයි ද පැවති ආණ්ඩුවේ සාමාජිකයන් වූ තමන් ඒ තුළ කටයුතු කළේ ඉතාමත් කණගාටුවෙන් යැයි ද තම කණ්ඩායමේ අදහස්වලට එහි  ඉඩක් නොතිබු බව ද හෙතෙම සඳහන් කළේය. 

(ඡායාරූප ලහිරු හර්ෂණ)