(විනීතා එම්  ගමගේ)
 
විධායක ජනාධිපති ක‍්‍රමය අහෝසි කිරීමේ අවශ්‍යතාවය පිළිබඳව ජනතාව දැනුවත් කිරීමේ දැවැන්ත වැඩපිළිවෙළකට අවතිර්ණ වීමට ජාතික භික්ෂු පෙරමුණ කටයුතු කරන බව එම පෙරමුණේ ලේකම් වකමුල්ලේ උදිත හිමියෝ පැවැසූහ.

මෙම විධායක ජනාධිපති  ක‍්‍රමය අහෝසි කිරීමේ පනත පාර්ලිමේන්තුව තුළ විවාදයට ගන්නා අවස්ථාවක හෝ ඒ වෙනුවෙන් වු ජනමත විචාරණයක් සඳහා රජය සුදානම් වන අවස්ථාවක මේ පිළිබඳව ජනතාව දැනුවත් කරන අන්දමේ කරුණු පැහැදිලි කෙරෙන පත‍්‍රිකාවක් සෑම විහාරස්ථානයකටම ලැබෙන්නට සලස්වන බවත් ඒ හරහා ජනතා නියෝජිතයන් ද ජනතාව ද දැනුවත් කිරීම ඉතා පහසුවෙන් කළ හැකි වන බවත් උන් වහන්සේ කියා සිටියහ.

මේ අතර දේශපාලන කෙෂත‍්‍රයේ සිටින සියලූ දෙනාට ද මේ පිළිබඳ බලපෑම් කිරීමට ජාතික භික්ෂු පෙරමුණ කටයුතු කරමින් සිටින බව ද උදිත හිමියෝ තව දුරටත් කියා සිටියහ.

තමන් ගොඩ නගන මතය සමාජ ගත කිරීම පහසුවෙන් කළ හැකි වෙතැයි බලාපොරොත්තු වන බව ද උන්වහන්සේ තවදුරටත් කීහ.

විධායක ජනාධිපති ක‍්‍රමයේ අත්තනෝමතික බව අප නිරන්තරව සියලූ කි‍්‍රියාකාරකම්වල දී අත් විඳින බවත් විවිධ අංශ විසින්  එම ක‍්‍රමය රටට නොගැලපෙන බව කියා සිටියේ 1977/78 තරම් ඈත කාලයක සිට බවත් උදිත හිමියෝ කීහ. 

විධායක ජනාධිපති ක‍්‍රමය නැතිව බැරියැයි සිතන සංඝයා වහන්සේට ත‍්‍රිපිටකය සමාජ ගත කිරීමට කිසිසේත්ම නොහැකිවනු ඇතැයි ද උදිත  හිමියෝ කීහ.

උන්වහන්සේ මේ අදහස් පළ කළේ සම්බුද්ධත්ව ජයන්ති මන්දිරයේ දී අද (07) පැවැති ජාතික භික්ෂු පෙරමුණේ මාධ්‍ය හමුවක දී අදහස් දක්වමිනි.