(විනීතා එම් ගමගේ)
 
 
මරණීය දණ්ඩනය නියම වූ රැඳවියන් හා මරණීය දණ්ඩනයට ලක්ව අභියාචනා ඉදිරිපත් කර ඇති රැඳවියන් 1299 කට දෙසැම්බර් 31 වැනි දා වනවිට මෙරට බන්ධනාගාර තුළ සිටින බව අධිකරණ හා බන්ධනාගාර ප්‍රතිසංස්කරණ අමාත්‍යංශය පවසයි.
 
ඒ අතර පිරිමි පුද්ගලයින් 1215 දෙනෙකු හා  කාන්තාවන් 84 දෙනෙකු සිටින බව බන්ධනාගාර ප‍්‍රතිසංස්කරණ හා අධිකරණ අමාත්‍යංශයේ ජ්‍යෙෂ්ඨ නිලධාරියෙක් පැවසීය.
 
එම රැඳවියන් අතරින් පිරිමි රැඳවියන් 789 දෙනෙකු හා කාන්තා රැඳවියන් 34 දෙනෙකු තමන්ට නියම කර ඇති මරණ දඬුවම සම්බන්ධයෙන් අභියාචනා ඉදිරිපත් කර ඇතැයි ද හෙතෙම සඳහන් කළේය.
 
ස්ථිර වශයෙන්ම මරණීය දණ්ඩනය නියම කර ඇති රැඳවියන් 476 දෙනෙකු සිටින බවත් ඒ අතර පිරිමි පුද්ගලයින් 426 දෙනෙකු හා කාන්තාවන් 50 දෙනෙකු සිටින බවත් ඔහු වැඩිදුරටත් කීය.