බිඟුන් මේනක ගමගේ

පළාත් සභා මැතිවරණය කඩිනමින් පවත්වන්නැයි පවසමින් පාර්ලිමේන්තුව නියෝජනය කරන සියලු දේශපාලන පක්ෂ කරන්නේ බොරුවක් යැයි නිදහස් හා සාධාරණ සමාජයක් වෙනුවෙන් වූ ජාතික ව්‍යාපාරය හෙවත් කැෆේ සංවිධානය චෝදනා කරයි.

පළාත් සභා වැඩි සංඛ්‍යාවක නිල කාලය අහෝසි වී තිබෙද්දී ඒවායේ කටයුතු මහජන නියෝජිතයින්ගෙන් ගිලිහී යාම ප්‍රජාතන්ත්‍ර විරෝධී ක්‍රියාවකැයි මැතිවරණ කොමිෂන් සභාව පැවැසීම සාධාරණ යැයි කී හෙතෙම මේ තත්ත්වයට විසඳුම් දීමේදී මැතිවරණ කොමිසමට කළ හැකි දෙයක් නැතැයි ද අවධාරණය කර කීය.

ඒ අනුව පළාත් සභා මැතිවරණ කඩිනමින් පැවැත්වීමට බලතල පාවිච්චි කළ හැක්කේ පාර්ලිමේන්තුවට වුවත් පාර්ලිමේන්තුව නියෝජනය කරන කිසිදු දේශපාලන පක්ෂයක් ඒ වෙනුවෙන් මැදිහත් වී නැතැයි ද තෙන්නකෝන් මහතා කීවේය.

මේ වනවිට පළාත් සභා මැතිවරණ ඉල්ලා බලකරන්නේ පාර්ලිමේන්තුව හෝ පළාත් සභාව නියෝජනය නොකරන බැසිල් රාජපක්ෂ හා මෛත්‍රී ගුණරත්න යන දේශපාලකයන් පමණක් වීම කනගාටුවට කරුණක් යැයි ද ඔහු කීය.

උතුරු නැගෙනහිර ගැටලුවට පිළියමක් ලෙස පළාත් සභා හඳුන්වා දුන්න ද දෙමළ ජාතික සන්ධානයවත් ඒ ගැන උනන්දුවක් නොදක්වන්නේ යැයි ද නැගෙනහිර පළාත් සභාව අකර්මණ්‍ය වී මාස 13 ක් ගතවී තිබියදීත් නිහඬ පිළිවෙතක් අනුගමනය කිරීමෙන් එය හොඳින්ම පැහැදිලි වන්නේ යැයි ද තෙන්නකෝන් මහතා වැඩිදුරටත් සඳහන් කළේය.