(නාලක සංජීව දහනායක)
 
අගමැතිවරයා තමන්ගේ ආරක්‍ෂාව වෙනුවෙන් විධායක ජනාධිපතික‍්‍රමය අහෝසි කිරීමට කැබිනට් පත‍්‍රිකාවක් ඉදිරිපත් කිරීම පිළිකුලෙන් යුතුව හෙළා දකින බව  එක්සත් ජනතා නිදහස් සන්ධාන මන්ත්‍රී ලක්‍ෂ්මන් යාපා අබේවර්ධන මහතා අද (20) පැවැසීය.
 
එමෙන්ම එම කුමන්ත‍්‍රණය පරාජය කළ සියලූම කැබිනට් ඇමතිවරුන්ට ස්තූතිය පළකරන බවද ඔහු කීය.
 
මන්ත‍්‍රීවරයා මෙසේ ද කීය.
 
“19 වැනි ව්‍යවස්ථා සංශෝධනය කරලියට ගෙනාවේ 20 වැනි ව්‍යවස්ථා සංශෝධනය ගෙන එන බවට පොරොන්දු වෙලයි. එවකට හිටපු පාර්ලිමේන්තු මන්ත‍්‍රී සරත් වීරසේකර මහතා හැරුණුවිට අනෙකුත් සියලු පාර්ලිමේන්තු මන්ත‍්‍රීවරුන් 19 වැනි ව්‍යවස්ථා සංශෝධනයට පක්‍ෂව ඡන්දය දුන්නා. නමුත් ආණ්ඩුව 19 වැනි ව්‍යවස්ථා සංශෝධනය තුළින් රට අනවශ්‍ය දේශපාලන ප‍්‍රශ්නයකට තල්ලුකරලා 20 වැනි ව්‍යවස්ථා සංශෝධනය ගෙනඒම මඟ හැරියා. ඒ සම්බන්ධයෙන් අගමැතිවරයා ජාතියෙන් සමාව ගතයුතුයි.
 
පාස්කු ප‍්‍රහාරය එල්ලවු අවස්ථාවේදිත් හදිසියේ රැස්නොවුණු කැබිනට් මණ්ඩලය 20 වැනි ආණ්ඩුක‍්‍රම ව්‍යවස්තා සංශෝධනය ගෙනඒම සඳහා රැස්කළා. අගමැතිවරයාගේ උවමනාව මත රැස්වූ එම කැබිනට් රැස්වීමේදී ඔහු විසින් 20වැනි ව්‍යවස්ථා සංශෝධනය ඉදිරිපත් කළා. නමුත් ඔහුගේ උත්සාහය සාර්ථක වුනේ නැහැ. තමන්ගේ ආරක්‍ෂාව වෙනුවෙන් අගමැතිවරයා මෙවැන්නක් ගෙනඒම අපි පිළිකුලෙන් යුතුව හෙළා දකිනවා. එමෙන්ම ඒ කුමන්ත‍්‍රණය පරාජය කළ සියලූම කැබිනට් අමාත්‍යවරුන්ට අපි ස්තූතිය පළ කරනවා.”
 
බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු කාර්යාලයේදී අද (20) පැවැති මාධ්‍ය හමුවකට එක්වෙමින් මන්ත‍්‍රීවරයා මේ බව සඳහන් කළේය.