නාලක සංජීව දහනායක
 
උතුරු පළාත් සභාවේ හිටපු ප‍්‍රධාන අමාත්‍ය සී.වී.විග්නේෂ්වරන් මහතා දෙමළ ජාතික සන්ධානයෙන් ඉවත්වී නව දේශපාලන පක්‍ෂයක් පිහිටුවීම හරහා බෙදුම්වාදී දේශපාලන මත දරණ දේශපාලන පක්‍ෂ කැබලිවීමේ ප‍්‍රවණතාවයක් ඇතිවීම රටට යහපතක් යැයි ජාතික නිදහස් පෙරමුණේ නායක, කොළඹ දිස්ත‍්‍රික් පාර්ලිමේන්තු මන්ත‍්‍රී විමල් වීරවංශ මහතා අද (26) පැවසීය.

එමෙන්ම ජනාධිපතිවරයා ඝාතනය කිරීමේ කුමන්ත‍්‍රණය සම්බන්ධයෙන් නීතිය විදුලි වේගයෙන් ක‍්‍රියාත්මක යුතු වුවද එම කුමන්ත‍්‍රණය සම්බන්ධයෙන් ඉතාම මන්දගාමීව නීතිය ක‍්‍රියාත්මක වන බවද කීය. 

ජනාධිපතිවරයා ඝාතනය කිරීමට කුමන්ත‍්‍රණය කිරීම සම්බන්ධයෙන් චෝදනා ලත් ත‍්‍රස්ත විමර්ෂණ කොට්ඨාසයේ හිටපු නියෝජ්‍ය පොලිස්පති නාලක ද සිල්වා අත්අඩංගුවට ගැනීමෙන් පමණක් මෙම පරීක්‍ෂණ පිළිබඳව සෑහීමකට පත්විය නොහැකි බවත් මෙම ඝාතන කුමන්ත‍්‍රණය පිටුපස සිටින සියලූම දෙනා ඉතාම ඉක්මණින්ම අත්අඩංගුවට ගත යුතු යැයිද මන්ත‍්‍රීවරයා කීය.

මහජන එක්සත් පෙරමුණ හා ජාතික නිදහස් පෙරමුණ අතර පිටකෝට්ටේ පිහිටි ජාතික නිදහස් පෙරමුණු ප‍්‍රධාන කාර්යාලයේ පැවති සාකච්ඡාවකින් පසුව මාධ්‍ය වෙත අදහස් දක්වමින් මන්ත‍්‍රීවරයා මේ බව පැවසීය.