(ශාන්ත ප්‍රදීප් කුමාර කුලරත්න)

රෝගී මවක ප්‍රතිකාර සඳහා රෝහලට පැමිණීමෙන් පසුව ඇයගේ රෝගී තත්ත්වය උත්සන්න වීම නිසා නේවාසිකව ප්‍රතිකාර ලැබීමට වෛද්‍යවරුන් නිර්දේශ කිරීමත් සමඟ ඇය සමඟ පැමිණ සිටි දොළොස් හැවිරිදි පුතකු සහ තුන් හැවිරිදි දියණිය භාරදීමට භාරකරුවකු නොවීම හේතුවෙන් දින තුනක් තිස්සේ රෝහලේ නවත්වාගෙන ඔවුන් දෙදෙනාට ආහාරපාන ඇඳුම් පැළඳුම් සෙල්ලම් බඩු ලබාදෙමින් රැකබලා ගැනීමේ ආදර්ශවත් සිද්ධියක් හෝමාගම මූලික රෝහලෙන් වාර්තා වේ.

මෙහිදී හෝමාගම මූලික රෝහලේ වෛද්‍ය අධිකාරී විශේෂඥ වෛද්‍ය ජයරුවන් බණ්ඩාර මහතා ඇතුළු වෛද්‍යවරුන් හෙද හෙදියන් ඇතුළු සෞඛ්‍ය කාර්ය මණ්ඩලය මේ සිදු කළ සත්ක්‍රියාව වෛද්‍ය වෘත්තියට එහා ගිය මානුෂීය සත්කාරයක් බැවින් සිද්ධිය කන වැකුණු සියලු‍ දෙනාගේ ප්‍රශංසාව හිමිවිය.

මෙම සිදුවීම ඉකුත් 04 වැනිදා හෝමාගම මූලික රෝහලෙන් වාර්තා වූ අතර සිදුවීම සැකෙවින් මෙසේය.

අධික ලෙස උණ රෝගයෙන් පෙළුණු 39 හැවිරිදි මවක සිය දියණිය සහ පුතනුවන් සමඟ ප්‍රතිකාර සඳහා හෝමාගම මූලික රෝහලේ බාහිර ප්‍රතිකාර ඒකකයට පැමිණ සිටියාය. එහිදී අධික උණ තත්ත්වය නිසා සිදු කළ රුධිර පරීක්ෂණයේදී අනාවරණය වී තිබුණේ මවගේ රුධිර පට්ටිකා මට්ටම ශීඝ්‍රයෙන් පහළ ගොස් ඇති බවයි. ඒ අවදානම් තත්ත්වය හේතුවෙන් වෛද්‍යවරුන් පවසා ඇත්තේ මව වහාම නේවාසිකව ප්‍රතිකාර ලැබීම සඳහා ඇතුළත් කරන ලෙසයි.

එහෙත් රෝගී මව දෙලොවක් අතර තනි වී සිටියේ ඇය සමඟ රෝහලට පැමිණි දරු දෙදෙනා භාරදීමට භාරකරුවකු නොමැති නිසාය.

මේ තත්ත්වය තේරුම් ගත් බාහිර ප්‍රතිකාර ඒකකයේ වෛද්‍යවරු වෛද්‍ය අධිකාරී විශේෂඥ වෛද්‍ය ජයරුවන් බණ්ඩාර මහතා ක්ෂණිකව දැනුවත් කර ඔහුගේ උපදෙස් මත ප්‍රතිකාර සඳහා මව රෝහලට ඇතුළත් කර දරු දෙදෙනා රෝහලේ ළමා වාට්ටුවේ රැකවරණයට යොමු කළහ.

එහිදී දරු දෙදෙනාට ආහාරපාන ඇඳුම් පැළඳුම් නොතිබූ හෙයින් රෝහල් කාර්ය මණ්ඩලයේ වට්ස්ඇප් ගෲප් එක හරහා ඒ බව ප්‍රචාරය කර ළමා වාට්ටුවේ කාර්ය මණ්ඩලය පියවර ගෙන තිබුණේ  දරු දෙදෙනාට ආහාරපාන, ඇඳුම් පැළඳුම් සෙල්ලම්බඩු ඇතුළු සත්කාරවලින් සහාය වීමටය. ඒ සඳහා  රෝහල් කාර්ය මණ්ඩලය යුහුසුලුව ක්‍රියා කර තිබිණි.

දරු දෙදෙනා 6 වැනිදා වනවිට දින තුනක් සෞඛ්‍ය කාර්ය මණ්ඩලයේ සෙනෙහස හා රැකවරණය මැද ළමා වාට්ටුවේ රැඳී සිටින අතර මවගේ තත්ත්වය සාමාන්‍ය අතට හැරෙමින් තිබේ.

මෙම සිදුවීම වෛද්‍ය වෘත්තියට එහා ගිය ආදර්ශවත් මානුෂීය සත්කාරයක් බැවින් ඊට කාගේත් ප්‍රශංසාව හිමිවිය.

පසුව මවගෙන් ලද තොරතුරකට අනුව ඇයගේ නිවස පිහිටි බව පැවසෙන පාදුක්ක අංගම්පිටිය ප්‍රදේශයේ ලිපිනයක් සොයා පොලිසිය ගියද නියම භාරකරුවකු මෙතෙක් සොයා ගැනීමට නොහැකි වී තිබේ.

මේ පිළිබඳව හෝමාගම මූලික රෝහලේ වෛද්‍ය අධිකාරි විශේෂඥ වෛද්‍ය ජයරුවන් බණ්ඩාර මහතාගෙන් විමසූ විට ඔහු මෙසේ පැවසීය.

දරු දෙදෙනකු සමඟ මවක් අපේ රෝහලට උණ රෝගය සඳහා ප්‍රතිකාර ගන්න පැමිණියා. ඒ වෙලාවේ මව රුධිර පරීක්ෂණයකට යොමු කිරීමේදී ඇයගේ රුධිර පට්ටිකා තත්ත්වය සීඝ්‍රයෙන් පහළ බැස තිබුණා. ඒ අනුව බාහිර ප්‍රතිකාර ඒකකයේ වෛද්‍යවරයා නිගමනය කර තිබුණේ ඇය රෝහල් ගත කිරීමටයි.

පසුව ඇය සමඟ පැමිණ සිටි දරු දෙදෙනා භාරදීමට මවගෙන් ලද ලිපිනයක් අනුව සොයා බැලු‍වත් නියම භාරකරුවකු සොයා ගැනීමට හැකිවුණේ නැහැ. ඒ නිසා සෞඛ්‍ය කාර්ය මණ්ඩලය පියවර ගෙන තිබුණේ දරු දෙදෙනා ළමා වාට්ටුවේ නවතාගෙන රැකවරණය ලබා දීමටයි.

එහිදී අපේ රෝහලේ වෛද්‍යවරුන් හෙද හෙදියන් ඇතුළු කාර්ය මණ්ඩලය ක්ෂණිකව ක්‍රියාත්මක වී දරුවන්ට අවශ්‍ය ආහාරපාන ඇඳුම් පැළඳුම් සෙල්ලම් බඩු ගෙනැවිත් දෙමින් හොඳින් රැකබලා ගනිමින් සිටිනවා. මව වෙනම වාට්ටුවක ප්‍රතිකාර ගන්නවා.

ඇත්තෙන්ම අපි මීට පෙර අහල දැකල තියෙන්නේ මෙවන් සිදුවීමකදී දරු දෙදෙනා බාහිර පාර්ශ්වයකට භාරදීමයි. නමුත් අපේ කාර්ය මණ්ඩලය එසේ නොකර දරු දෙදෙනාට සෙනෙහස හා රැකවරණය ලබා දෙමින් රැක බලාගැනීමේ ආදර්ශවත් ක්‍රියාවලියකට යොමුවෙලා තිබෙනවා. ඒ පිළිබඳව අපි හැමදෙනාගේම ස්තූතියි ඔවුන්ට හිමිවිය යුතුයි.

අපි තවදුරටත් සොයා බලනවා භාරකරුවකු ඉන්නවද කියලා. එසේ නොමැති වුණොත් මව සුව වෙන තෙක් දරු දෙදෙනා සෞඛ්‍ය කාර්ය මණ්ඩලය යටතේ රෝහලේ නේවාසිකව තබා ගැනීමටයි පියවර ගෙන ඇත්තේ යැයිද කීය.