(සුජිත් හේවාජුලිගේ)

ඇතැම් සමූපකාර ප්‍රාදේශිකවල විවිධ දූෂණ වලට සම්බන්ධ පුද්ගලයන් විශාල පිරිසක් දඬුවම් නැතිව එම  තනතුරු වලම රැඳී සිටින බව වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන කටයුතු පිළිබඳ අමාත්‍යාංශයීය උපදේශක කාරක සභාවේදී තොරතුරු හෙළි විය.

මේ අනුව සමූපකාරවල  නෛතික දුර්වලතා ඇතුළු අනෙකුත් අඩුපාඩු කඩිනමින් විසඳීමට  අමාත්‍ය  වසන්ත සමරසිංහ මහතා    අදාළ නිලධාරීන්ට උපදෙස් ලබා දුන්නේය .

මෙම කාරක සභා රැස්වීමට වෙළෙඳ, වාණිජ සහ ආහාර සුරක්ෂිතතා  නියෝජ්‍ය අමාත්‍ය ආර්.එම් ජයවර්ධන සහ සමූපකාර සංවර්ධන  නියෝජ්‍ය අමාත්‍ය උපාලි සමරසිංහ යන මහත්වරුන් ඇතුළු  පාර්ලිමේන්තු මන්ත්‍රීවරු පිරිසක් ද, වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යාංශය සහ ඒ  යටතේ පවතින ආයතන නියෝජනය කරන නිලධාරීහු පිරිසක් ද  සහභාගී වූහ.