(අංජුල මහික වීරරත්න)

කොළඹ වරාය නගරය (සහාධිපත්‍ය දේපළ කළමනාකරණය) නියෝග පාර්ලිමේන්තුවට ඉදිරිපත් කිරීම සඳහා කැබිනට් අනුමැතිය ලැබී ඇත.

කොළඹ වරාය නගරයේ ප්‍රධාන සැලැස්මට අනුව දළ බිම් ප්‍රමාණයෙන් 51%ක් නේවාසික පරිහරණය සඳහා වෙන් කර ඇති අතර එමඟින් සහාධිපත්‍ය දේපළ සංර්වධනය සඳහා මග සලසන බව රජය පවසයි. 

ඒ අනුව සහාධිපත්‍ය කොටස් වල හිමිකරුවන්ට සහ කුලී නිවැසියන්ට බාධාවකින් තොරව ජීවත්වීමේ අවකාශ සලසා දෙමින් ජාත්‍යන්තර ප්‍රමිතියෙන් යුත් පොදු පහසුකම් සහ අංගෝපාංග පවත්වා ගෙන යාමට නියාමන ආයතනයක් ස්ථාපිත කිරීම සහ නියෝග පැනවීමට අවශ්‍ය වී ඇත.

2021 අංක 11 දරන කොළඹ වරාය නගරය ආර්ථික කොමිෂන් සභා පනතේ විධිවිධාන පරිදි අංක 2394/68 හා 2024-07-26 දිනැති අති විශේෂ ගැසට්‌ නිවේදනය මඟින් 2024 අංක 03 දරන කොළඹ වරාය නගරය (සහාධිපත්‍ය දේපළ කළමනාකරණය) නියෝග ප්‍රකාශයට පත් කරනු ලැබ තිබේ.

එකී නියෝග අනුමැතිය පිණිස පාර්ලිමේන්තුවට ඉදිරිපත් කිරීම සඳහා ආයෝජන ප්‍රවර්ධන  අමාත්‍ය වශයෙන් ජනාධිපතිවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.