විපක්ෂය සහාය දුන්නොත් ලයිට් බිල අඩු කරන්න පුළුවන්

(සුජිත් හේවාජුලිගේ සහ  අංජුල මහික වීරරත්න )

අලුත් විදුලිය ජනන සැලසුමට විපක්ෂය ඇතුළු සියලු දෙනා සහය දුනහොත් ලබන ජූලි මාසයේදී විදුලිය ගාස්තු අඩු කිරිමට හැකිවන බව විදුලිබල හා බලශක්ති අමාත්‍ය කංචන විජේසේකර මහතා පාර්ලිමේන්තුවේ දී අද (8) පැවසීය.

අමාත්‍යවරයා මෙසේ පැවසුවේ විපක්ෂ නායක සජිත් ප්‍රේමදාස මහතා විදුලිය මිල සම්බන්ධයෙන්  ස්ථාවර නියෝග 27 (2)  යටතේ මතු කළ ප්‍රශ්නයට ප්‍රශ්නයකට පිළිතුරු දෙමිනි.

විදුලි බල හා බලශක්ති අමාත්‍ය කංචන විජේසේකර මහතා

විපක්ෂ නායකවරයා වැරදි ප්‍රශ්නයක් මතු කළේ. මහජන උපයෝගීතා කොමිසම කොමිසමේ දැඩි විරෝධය මත ආණ්ඩුව තීරණයක් ගත්තා කිව්වා. බහුතර සාමාජිකයන්ගේ කැමැත්තෙන් තමයි අනුමැතිය ලැබුණේ. එක සාමාජිකයකුගේ විරෝධය මුළු කොමිසමේම විරෝධය  ලෙස හුවා දැක්වීම වැරදියි. කොමිසමේ සාමාජිකයන් පස් දෙනෙකු ඉන්නවා.

එක පුද්ගලයකු  මහජන උපයෝගීතා කොමිෂන් සභාව  නොවෙයි. ගාස්තු වැඩි කළේ විදුලි බල මණ්ඩලයේ පාඩු පියවා ගන්න නෙවෙයි. ජනන සැලැස්ම නිවැරදි ආකාරයට ක්‍රියාත්මක කිරීමටයි. මණ්ඩලයේ දූෂණ වංචා අවම කිරීමට අපි යෝජනා ඉදිරිපත් කරනවා. නමුත් ඒවට විරුද්ධව සමහරු වැඩ කරනවා. සමහර වෘත්තිය සමිති පාලනාධිකාරිය ආණ්ඩුව බිත්තියට හේත්තු කරල වැඩ කරනවා. අපි අද අඛණ්ඩව විදුලිය සපයනවා. විදුලිය කප්පාදුව නැවැත්තුවා. අපේ ජනන සැලසුම  වෙනස් වෙන්න ඕන. මේ ගාස්තු අය කිරීම නිසා අඛණ්ඩව විදුලිය දෙන්න පුළුවන් වුණා.මේ ජනන සැලසුම ක්‍රියාත්මක වීමේදී  දෙසැම්බර් වෙද්දී විදුලිය බිල අඩු කරන්න පුළුවන් වේවි.  ජුලි මාසයේදී අඩු කරන්න පුළුවන් නම් කරනවා. විදුලිබලමන්ඩලය ප්‍රති ව්‍යුහය කරන සැලසුම මාසයක් ඇතුලත ඉදිරිපත් කරනවා. ඒ  සැලසුමට  ඔබතුමාලගේ සහාය දෙන්න.එවිට විදුලි බිල ජුලි මාසය වන විට අඩු කරන්න පුළුවන් වෙනවා.