(සුජිත් හේවාජුලිගේ )

ලංකා විදුලිබල මණ්ඩලය කැබිනට් මණ්ඩලයේ තීරණය පරිදි එස් පවර් ඇඹිලිපිටිය පුද්ගලික විදුලි සමාගම මිලදී නොගැනීමෙන් රජයට බරපතළ පාඩුවක් සිදුව ඇතැයි එස් පවර් ඇඹිලිපිටිය පුද්ගලික සමාගමෙන් විදුලිය මිලට ගැනීම සම්බන්ධයෙන්වූ විශේෂ විගණන වාර්තාවේ සඳහන් වේ.

මේ අතර බලාගාරයේ වටිනාකම නිවැරදි ලෙස තක්සේරු නොකිරීම හේතුවෙන් ධාරිතා ගාස්තුවේ ප්‍රතිලාභ වෙනුවෙන් කෝටි එකසිය විස්සක් වැඩියෙන් ගෙවා ඇති බවද නිරීක්ෂණය වූයේ යැයි එම වාර්තාව අනාවරණය කළේය.

හිමිකරුගේ ලංසුව අනුව එසේ ප්‍රතිලාභ වෙනුවෙන් ගෙවූ මුදල රුපියල් කෝටි 365 කි.

මෙරට විදුලිය ඉල්ලුම සපුරාලීම සඳහා එස් පවර් පුද්ගලික සමාගමෙන් 2005 වර්ෂයේ අප්‍රියෙල් 6 වැනිදා සිට වසර 10 ක කාලයක් සඳහා විදුලිය මිලදී ගැනීමට ලංකා විදුලිබල මණ්ඩලය ගිවිසුමක් අත්සන් කර ඊට අනුව කටයුතු කර තිබූ බවත් එම ගිවිසුම අවසන්වූ පසු 2016 අප්‍රේල් 6 වැනි දා රැස් වූ අමාත්‍ය මණ්ඩලය බලාගාරය මිලදී ගැනීමට කටයුතු කරන ලෙසට ලංකා විදුලිබල මණ්ඩලයට උපදෙස් දී තිබූ බවත් වාර්තාවේ දැක්වේ.

රජයේ තක්සේරුකරු බලාගාරයේ වටිනාකම රුපියල් කෝටි 237 ක් ලෙස ගණනය කර තිබූ බව පවසන විගණන කාර්යාලය බලාගාරයේ හිමිකරු රුපියල් කෝටි 244 ක මිලක් මණ්ඩලයට ඉදිරිපත් කර තිබූ හෙයින් බලාගාරය මිලදී ගැනීමට කටයුතු කර නොතිබූ බවත් සඳහන් කළේය.

නිවැරදිව තක්සේරු කළේ නම් බලාගාරයේ වටිනාකම රුපියල් කෝටි 417 කට ආසන්න අගයක් විය යුතු බවට විගණන අංශ නිරීක්ෂණය කර තිබිණ.

බලාගාරය මිලදී ගැනීමෙන් තොරව 2016 වර්ෂයේ සිට ඉන් විදුලිය මිලදී ගැනීමට ලංකා විදුලිබල මණ්ඩලය ගිවිසුම් ගතවීම හේතුවෙන් විශාල මුදලක් ඒ සමාගමට ගෙවීමට සිදුව ඇති බවද විගණන වාර්තාවේ දැක්වේ.

විදුලිබල මණ්ඩලය 2016- 2021 දක්වා වසර පහක කාලයේ දී ඒස් පවර් ඇඹිලිපිටිය බලාගාරය වෙතින් පමණක් විදුලිය මිලදී ගැනීම සඳහා වැය කර තිබූ මුදල රුපියල් කෝටි 5945 කි.

දකුණු ප්‍රදේශයේ විදුලි බල අර්බුදය විසඳීම සඳහා යෝජනා කර තිබූ විකල්ප අවස්ථා දෙක සහ පහ සඳහා වැය වෙතැයි අපේක්ෂා කර තිබූ සම්ප්‍රේෂණ පිරිවැය මෙන් පිළිවෙළින් දහතුන් ගුණයක් සහ එකළොස් ගුණයක ධාරිතා ගාස්තු ගිවිසුම දීර්ඝ කරන ලද වසර පහ සඳහා සමාගමට ගෙවීමට සිදුව තිබූ බවද විගණන නිලධාරීහු පෙන්වා දෙති.