ජාත්‍යන්තර අපරාධ අධිකරණය විසින් යුක්රේනයේ ජන සංහාර චෝදනා සම්බන්ධ නඩුවේ තීන්දුව හෙට (16) ප්‍රකාශයට පත් කිරීමට නියමිතව ඇත. ජන සංහාර අපරාධ වැළක්වීමේ සහ දඬුවම් දීමේ සම්මුතියට ප්‍රකාරව (යුක්රේනයට එදිරිව රුසියානු සමූහාණ්ඩුව) ජාත්‍යන්තර අපරාධ අධිකරණයේ චෝදනා ගොනු කළහ.

හෙට දින ශ්‍රී ලංකා වේලාවෙන් රාත්‍රී 8.30 ජාත්‍යන්තර අපරාධ අධිකරණයේ සභාපති විනිසුරු ජෝන් ඊ ඩොනෝග් විසින් නෙදර්ලන්තයේ හේග් නුවර ”සාම මාළිගය” ලෙස හැදින්වෙන ජාත්‍යන්තර අපරාධ අධිකරණ පරිශ්‍රයේදී තීන්දුව ප්‍රකාශයට පත් කිරීමට නියමිතව ඇත.

කොවිඩ්-19 වසංගතය හේතුවෙන් අද දින නඩුව විභාග වන අවස්ථාවේ අදාළ පාර්ශවයන්ට පමණක් අධිකරණ පරිශ්‍රය තුල රැඳී සිටීමට අවසර තිබෙන අතර නඩු විභාගය අන්තර්ජාලය ඔස්සේ සජීවීව විකාශනය කෙරේ.නඩු විභාගය පසුගිය සතියේ ආරම්භ වූ අතර එහිදී රුසියානු නියෝජිතයන් නඩු විභාගය සඳහා සහභාගී නොවූහ.

“රුසියානු නියෝජිතයන් අධිකරණයේ නැහැ ඒගොල්ලො ඉන්නේ යුද පිටියේ මගේ රටට විරුද්ධව දරුණු හමුදා  ප්‍රහාර දියත් කරමින්,රුසියාව යුද්ධය ආරම්භ කලේ ඩොන්බාස් වල ජන සංහාර සිදු වූ බව කියමින් මම කියන්න කැමති එහෙම ජන සංහාරයක් යුක්රේන හමුදා සිදු කළා නම් යුද්ධය නවත්තලා අවි බිමින් තියලා ඇවිල්ලා ජන සංහාරය පිළිබඳ සාක්ෂි ඉදිරිපත් කරන්න” යැයි යුක්රේන දූත ඇන්ටන් කොරිනෙවික් අධිකරණය හමුවේ ප්‍රකාශ කළේය.

මෙම මස මුලදී ජාත්‍යන්තර අපරාධ අධිකරණයේ හමුවේ චෝදනා ගොනු කරමින් යුක්රේනය පැවසුවේ රුසියාව යුක්රේන හමුදා ඩොන්බාස් තුල ජන සංහාරයක් සිදු කලායැයි අභූත චෝදනා නගමින් යුක්රේනයට පහරදීම ආරම්භ කළ බවයි.

මේ දක්වා එම පහර දීම හේතුවෙන් ළමුන් 79 ක්, යුක්රේන සොල්දාදුවන් 1300 ක්, රුසියානු හමුදා 12,000 ක් මරණයට පත්ව ඇති අතර, මේ දක්වා මිලියන 2.8 යුක්රේන ජනතාවක් අවතැන් වී සරණාගතයන් ලෙස වෙනත් රටවලට සංක්‍රමණය වී ඇති බව පෙන්වාදුන් යුක්රේන නියෝජිත පිරිස සැබෑ ජන සංහාරය සිදු වී ඇත්තේ කොතැනදැයි ප්‍රශ්න කළහ.

(රොයිටර්)