(ඩයනා උදයංගනී)

හිටපු ජනාධිපති ගෝඨභය රාජපක්ෂ මහතා ඉල්ලා අස්වීමෙන් පසු රටේ ජනාධිපතිවරයා වශයෙන් රනිල් වික්‍රමසිංහ මහතා පත්කරගැනීම නිවැරැදි තෝරා ගැනීමක් බව ශ්‍රී ලංකා පොදුජන පෙරමුණේ ජාතික සංවිධායක හා හිටපු ඇමැති බැසිල් රාජපක්ෂ මහතා පැවසීය.

රටේ ආර්ථික සහ අනෙකුත් ගැටළු ඉදිරියේ දී විසඳනු ඇතැයි අපේක්ෂා කරන බව ද බැසිල් රාජපක්‍ෂ මහතා සඳහන් කළේය.

ශ්‍රී ලංකා පොදුජන පෙරමුණ බෙදී ගොස් තිබෙන බවට යම් යම් පාර්ශව පැවසුව ද එහි සත්‍යතාවයක් නැතැයි කී රාජපක්‍ෂ මහතා අදටත් තම පක්ෂයේ සභාපතිවරයා මහාචාර්ය ජී.එල් පීරිස් මහතාම බව ප්‍රකාශ කළේය.

තම පක්ෂයේ පාඨය ”වෙනස්ව සිතන්න - බිය නොවන්න” යන්න ජී.එල් පීරිස් මහතා පෙන්වා දී ඇති බවත්, පක්ෂ විපක්ෂ සෑම කණ්ඩායමකටම නිදහසේ දේශපාලනය කිරීම සඳහා ඉඩ සලසා දියයුතු බවත් පැවසීය.

බැසිල් රාජපක්‍ෂ මහතා මේ බව පැවසුවේ ශ්‍රී ලංකා පොදුජන පෙරමුණු මාධ්‍ය මධ්‍යස්ථානය ආරම්භ කර සිවුවසරක් පිරීම නිමිත්තෙන් එම පක්ෂ ප්‍රධාන කාර්යාලයේ දී අද (5) පෙරවරුවේ පැවැති සැමරුම් උත්සවයට සහභාගි වෙමිනි.