(සුජිත් හේවාජුලිගේ )

කොවිඩ් ව්‍යාප්තියේ ඉහළ යෑම නිසා ඉදිරියේදී යම් හෙයකින් රට වසා දැමීමට සිදුවුවහොත් මාසික වේතනය ලබාගන්නා පුද්ගලයන්ටද ලොකු ගැටලුවක් ඇතිවිය හැකි බව නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් මහතා පැවැසීය.

එවැනි තත්වයකට රට පත් නොකිරීමේ වගකීම ඇත්තේද ජනතාව සතුව බවත් ජනතාව පූර්ණ එන්නත්කරණයට යොමුවී සෞඛ්‍ය ක්‍රමවේද අනුව කටයුතු කිරීමෙන් එවැනි තත්ත්වයක් ඇතිවීම වලක්වා ලිය හැකි බවත් හෙතෙම සඳහන් කළේය.

වඩා වැදගත් වන්නේ පැතිරෙමින් පවතින්නේ කුමන වයිරස් ප්‍රභේදයද යන්න නොව සෞඛ්‍ය ආරක්ෂිතව කටයුතු කිරීම බව පැවසූ විශේෂඥ වෛද්‍යවරයා බොහෝ පුද්ගලයන්ගේ හැසිරීම ගැන සතුටු විය නොහැකි බවද සඳහන් කළේ‍ය.

සමාජය තුළ පැතිර පවතින විවිධ මිථ්‍යා මත නිසා තෙවෙනි මාත්‍රාව ලබා ගැනීමට සමහරුන් මැලිකමක් දක්වන බව පෙනී යන බවත් එවැනි මිත්‍යා මතවලට නොරැවටෙන්නැයි ජනතාවගෙන් ඉල්ලා සිටින බවත් ඔහු කීවේය.

කොවිඩ් ආසාදිතයන් 942ක් පෙරේදා වාර්තා වූ අතර එවැනි ආසාදිතයන් වැඩි සංඛ්‍යාවක් වාර්තාවීම සිදුවූයේ මාස හතරකට පමණ පසුව බවද හෙතෙම පැවසීය.

ඔමික්‍රොන් වයිරස් ප්‍රභේදය රට පුරා ව්‍යාප්ත වෙමින් පවතින්නේයැයි ද, කොවිඩ් මර්දන සෞඛ්‍ය මාර්ගෝපදේශ නිවැරදි ආකාරයට පිළිපැදීමට සැමදෙනා හිතට ගත යුතු යැයිද හේමන්ත හේරත් මහතා පැවසීය.

කොවිඩ් තුන්වැනි මාත්‍රාවමෙතෙක් නොගත් අය ළඟම ඇති සෞඛ්‍ය වෛද්‍ය නිලධාරී කාර්යාලයට හෝ ප්‍රධාන රෝහලකට ගොස් එන්නත ගන්නා ලෙසද ඒ මහතා මහජනතාවගෙන් ඉල්ලා සිටියි.