(අංජුල මහික වීරරත්න)

රටේ පවතින වත්මන් අර්බුද වලට එකමුතුව මුහුණ දෙන ආකාරය ගැන දේශපාලන පක්ෂ වලට අමතරව වෘත්තිය සමිති,වෘත්තීයවේදී සංවිධාන සහ බහුජන සංවිධාන රැසක් සමඟ සාකච්ඡා ඇරඹීමට එක්සත් ජාතික පක්ෂය තීරණය කර තිබේ.

එක්සත් ජාතික පක්ෂය මෙම තීරණය ගත්තේ හිටපු ආණ්ඩුකාර ජනාධිපති නීතීඥ මෛත්‍රී ගුණරත්න, හිටපු ආණ්ඩුකාර කීර්ති  තෙන්නකෝන්, හිටපු ආණ්ඩුකාර අසාද් සාලි, නීතීඥ ශිරාල් ලක්තිලක සහ නීතීඥ ගුණරත්න වන්නිනායක යන මහත්වරුන්ගෙන් සමන්විත කණ්ඩායමක් සමග එජාප නියෝජ්‍ය නායක රුවන් විජයවර්ධන මහතා ප්‍රමුඛ එජාප නායකයන් සිරිකොත පක්ෂ මූලස්ථානයේ පැවැත් වූ සාකච්ඡාවෙන් පසුවයි.

හිටපු ආණ්ඩුකාරවරුන්සමඟ පැවැත්වූ සාකච්ඡාව වල ප්‍රගතිය පිළිබඳව එක්සත් ජාතික පක්ෂ මහ  ලේකම් පාලිත රංගේ බණ්ඩාර මහතා විසින් පක්ෂ නායක රනිල් වික්‍රමසිංහ මහතා දැනුම්වත් කිරීමෙන් පසුව වෘත්තීය සමිති ඇතුළු සංවිධාන සමඟ සාකච්ඡා කරන ලෙස රනිල් වික්‍රමසිංහ මහතා උපදෙස් දී තිබේ.

රජයට එරෙහි සියලූ බලවේග ඒකරාශී කරගනිමින් සාකච්ඡා අරඹන ලෙස පක්ෂ නායක රනිල් වික්‍රමසිංහ මහතා දුන් උපදෙස් අනුව මෙම සාකච්ඡා ඇරඹීමට නියමිතය.

එය සමගම අනෙකුත් දේශපාලන පක්ෂ සමග කරන සාකච්ඡා ද අඛණ්ඩව ඉදිරියට ගෙනයන බව පක්ෂ මහලේකම් පාලිත රංගේ බණ්ඩාර මහතා කීය.