(ගයාන් සූරියආරච්චි)

යුක්තිය මෙහෙයුම නව මුහුණුවරකින් ආරම්භ කිරීමත් සමඟ ගතවු පැය 24 තුළ දිවයින පුරා සිදුකරන ලද  මෙහෙයුම් වලින් අපරාධකරුවන්  1426 ක්  අත්අඩංගුවට ගෙන ඇති බව පොලිස් මූලස්ථානය පවසයි.

අත්අඩංගුවට ගත් සැකකරුවන් සන්තකයේ තිබී හෙරොයින් 01 kg 86 g, අයිස්  782 g 722 mg, ගංජා 03 kg 774 g  මාවා  01 kg 100 g, මදන මෝදක  550 g 700 mg, තුල් 86 g 18 mg , ඈෂ් 380 g 64 mg සහ මත්පෙති1085 පොලිස් නිලධාරීන් විසින් සොයා ගනු ලැබීය.

මත්ද්‍රව්‍ය වැරදි සම්බන්ධ අත්අඩංගුවට ගත් සැකකරුවන් 1403 දෙනා අතර, පොලිස් මත්ද්‍රව්‍ය නාශක කාර්යංශය සහ පොලිස් විශේෂ කාර්යංශයේ ලැයිස්තුවේ සිටි සැකකරුවන් 213 ක්, රැදවුම් නියෝග මත රඳවා ගෙන විමර්ශනය සිදුකරන  පුද්ගලයින් 57 ක් වත්කම් විමර්ශන ආරම්භ කර ඇති  සැකකරුවන් 17 ක් සහ පුනරුත්ථාපන මධ්‍යස්ථාන වෙත යොමු කරන ලද සැකකරුවෝ 24ක් ද සිටිති.

අපරාධ අංශ වෙත යොමු කළ ලැයිස්තුවේ අත්අඩංගුවට ගත් සැකකරුවන් 23  දෙනා අතර විෂ මත්ද්‍රව්‍ය සම්බන්ධ විවෘත වරෙන්තු 01, විෂ නොවන මත්ද්‍රව්‍ය වැරදි සම්බන්ධ විවෘත වරෙන්තුකරුවන් 21 ක් ද බල අපරාධ සම්බන්ධව විවෘත වරෙන්තුකරුවන්  සැකකරුවෙක් ද  සිටියි.

පාතාලය මැඩලීමේ යුක්තිය මෙහෙයුම යටතේ ඊයේ දිනය තුළ  පාතාල අපරාධකරුවන් 04 ක් අත්අඩංගුවට ගෙන ඇති අතර, ඒ අනුව, මේ දක්වා ලේඛනගත පාතාල අපරාධකරුවෝ 795 දෙනෙක්  අත්අඩංගුවට ගනු ලැබූහ.